సినిమా సమీక్షలు
సంతోష్ శోభన్ ‘కపుల్ ఫ్రెండ్లీ’ రివ్యూ
చెన్నైలో ఇంటీరియర్ డిజైనింగ్లో తనకంటూ ఒక గుర్తింపు తెచ్చుకోవాలని పోరాడుతుంటాడు శివ (సంతోష్ శోభన్). ఖర్చుల కోసం పార్ట్టైమ్గా బైక్ పూలింగ్ (బైక్ ట్యాక్సీ) నడుపుతుంటాడు. ఒకరోజు ఒక పీజీ హాస్టల్ దగ్గర పేమెంట్ కోసం ఎదురుచూస్తుండగా, అక్కడ నివసించే మిత్ర (మానస వారణాసి) పరిచయం అవుతుంది.
ఆ చిన్న పరిచయం కాస్తా స్నేహంగా మారుతుంది. హాస్టల్ సమస్యల వల్ల మిత్రకు గది దొరక్కపోవడంతో, శివ తన రూమ్ను షేర్ చేసుకోవడానికి ముందుకు వస్తాడు. అలా మొదలైన వారి ప్రయాణం ప్రేమకు దారితీసి, ఇద్దరూ లివ్-ఇన్ రిలేషన్లోకి వెళ్తారు. మిత్ర చాలా తెలివైన అమ్మాయి. తను ఐటీ ఉద్యోగాల కోసం ప్రయత్నిస్తూనే, శివకు ఇంటీరియర్ డిజైనింగ్ ప్రాజెక్టులు వచ్చేలా సహాయం చేస్తుంది. ఆమె అండతో శివ ఆర్థికంగా నిలదొక్కుకుంటాడు.
అయితే, వీరి ప్రేమకథ రొటీన్ సినిమాల్లా సాగదు. వీరి మధ్యకు వచ్చే అడ్డంకి ఏదో సాధారణ విలన్ కాదు.. ఒక ఊహించని సంఘటన వారి జీవితాలను తలకిందులు చేస్తుంది. ఆ ప్రమాదం ఏమిటి? విధి ఆడిన ఈ వింత నాటకంలో శివ, మిత్రలు ఒక్కటయ్యారా? లేక వారి కథ విషాదంగా ముగిసిందా? అనేది సినిమా చూసి తెలుసుకోవాల్సిందే.
ఎనాలసిస్
దర్శకుడు అశ్విన్ చంద్రశేఖర్ రాసుకున్న ఈ కథ చూడటానికి రొటీన్ రొమాంటిక్ డ్రామాలా అనిపించినా, దాన్ని నడిపించిన తీరు మాత్రం చాలా రియలిస్టిక్ గా ఉంది. శివ-మిత్రల మధ్య వచ్చే ఈగో గొడవలు, ప్రేమ సన్నివేశాలు ఎక్కడా బలవంతంగా ఇరికించినట్టు కాకుండా చాలా ఆర్గానిక్ గా సాగుతాయి.
ఫస్టాఫ్: ఫ్రెష్ రొమాన్స్ & స్విఫ్ట్ పేస్!
సినిమా మొదటి సగం చాలా వేగంగా సాగిపోతుంది. శివ, మిత్రల మధ్య జరిగే రొమాంటిక్ సంభాషణలు స్క్రిప్ట్కు కొత్తదనాన్ని ఇస్తాయి. లివ్-ఇన్ రిలేషన్ను కేవలం గ్లామర్ కోణంలోనే కాకుండా, నేటి తరం యువత పడే ఆరాటాన్ని, పోరాటాన్ని కళ్ళకు కట్టినట్టు చూపించారు. అయితే అంతా సాఫీగా సాగుతున్నప్పుడు వచ్చే ఒక ట్విస్ట్ ప్రేక్షకులను షాక్కు గురి చేస్తుంది. కథ ఒక్కసారిగా వేరే మలుపు తీసుకోవడం చూసి ఆడియెన్స్ విస్తుపోతారు.
సెకండాఫ్: ఎమోషనల్ రైడ్ & లూప్హోల్స్!
సినిమాలోని అసలు మలుపును ఇంకొంచెం ముందుగా పరిచయం చేసి ఉంటే బాగుండేదేమో అనిపిస్తుంది. లీనియర్ స్క్రీన్ ప్లే (కథను అటు ఇటుగా నడిపించడం) బాగున్నా, కొన్ని చోట్ల ఫ్యామిలీ డ్రామా కాస్త బోర్ కొట్టిస్తుంది. అవి రొటీన్ సీన్లలా అనిపిస్తాయి. కానీ డైరెక్టర్ తెలివిగా మళ్ళీ ట్విస్ట్తో సినిమాను ట్రాక్లోకి తెచ్చాడు.
టెక్నికల్ గా..
మ్యూజిక్ & విజువల్స్: సినిమాలో ఒక్క చార్ట్బస్టర్ సాంగ్ లేకపోయినా, ఉన్న పాటలన్నీ వినడానికి, చూడటానికి చాలా బాగున్నాయి. బ్యాక్గ్రౌండ్ స్కోర్ సినిమా మూడ్ను పర్ఫెక్ట్గా ఎలివేట్ చేసింది.
రియల్ లొకేషన్స్: ఈ కథ చెన్నై నేపథ్యంలో సాగుతుంది. సినిమాను నిజమైన లొకేషన్లలో షూట్ చేయడం వల్ల ప్రతి సీన్ చాలా నేచురల్గా, రియలిస్టిక్ గా వచ్చింది.
డైరెక్షన్: కొత్త దర్శకుడైనా అశ్విన్ చంద్రశేఖర్ ప్రేక్షకులను బోర్ కొట్టించకుండా కథను నడిపించడంలో సక్సెస్ అయ్యాడు. నిర్మాణ విలువలు కూడా సినిమాకు తగ్గట్లుగా నీట్గా ఉన్నాయి.
నటీనటుల పెర్ఫార్మెన్స్ :
శివ పాత్రలో మరోసారి సంతోష్ శోభన్ తన సిన్సియర్ నటనతో ఆకట్టుకున్నాడు . ముఖ్యంగా ఫస్టాఫ్లో తన పెర్ఫార్మెన్స్ చాలా బాగుంది. ఇక మిత్ర పాత్రలో మానస చాలా ఈజ్తో, మెచ్యూరిటీతో నటించింది. ఒక నటిగా తన టాలెంట్ నిరూపించుకోవడానికి ఈ సినిమా ఆమెకు మంచి అవకాశాన్ని ఇచ్చింది. మానస కంటే సంతోష్ కొంచెం పెద్దవాడిగా అనిపించినా.. వీరిద్దరి మధ్య కెమిస్ట్రీ మాత్రం చాలా బాగా వర్కౌట్ అయ్యింది. మిగతా పాత్రల్లో సీనియర్స్ పాత్రకు తగ్గట్లు చేసుకుంటూ వెళ్లారు.
ఫైనల్ గా…:
‘కపుల్ ఫ్రెండ్లీ’ రొటీన్ హ్యాపీ ఎండింగ్ మూవీ కాదు. సినిమా చివరలో వచ్చే ఎమోషన్ చాలా బరువుగా ఉంటుంది. ఈ క్లైమాక్స్ అందరికీ నచ్చకపోవచ్చు, కానీ బలమైన ఎమోషన్స్ కోరుకునే వారికి మాత్రం ఈ సినిమా బాగా కనెక్ట్ అవుతుంది. నేటి కాలానికి తగ్గట్టుగా ఒక స్వచ్ఛమైన ప్రేమకథను చెప్పేందుకు చేసిన నిజాయితీ గల ప్రయత్నం ఇది.
ఈ వాలెంటైన్స్ డే వీకెండ్లో జంటగా కూర్చుని చూడటానికి ‘కపుల్ ఫ్రెండ్లీ’ ఒక డీసెంట్ ఛాయిస్!
