సినిమా వార్తలు
రెహమాన్ ‘అల్లా’ వైపు ఎందుకు వెళ్లారు? కారణం చెప్పిన ఆర్జీవి
ఒక వ్యక్తి తన పేరును, మతాన్ని, ఆచారాలను మార్చుకోవడానికి వెనుక ఉండే అసలు ప్రేరణ ఏంటి? ఈ విషయంపై సంచలన దర్శకుడు రామ్ గోపాల్ వర్మ (RGV) చేసిన విశ్లేషణ ఇప్పుడు ఇంటర్నెట్లో ప్రకంపనలు సృష్టిస్తోంది. ముఖ్యంగా ఆస్కార్ విజేత ఏ.ఆర్. రెహమాన్ (దిలీప్ కుమార్) ఇస్లాం మతాన్ని స్వీకరించడం వెనుక ఉన్న ‘లాజిక్’ గురించి వర్మ తనదైన శైలిలో ఒక క్రేజీ స్టోరీ చెప్పారు.
దిలీప్ కుమార్ టు ఏ.ఆర్. రెహమాన్: ఆ వారం రోజుల్లో ఏం జరిగింది?
రెహమాన్ ఒకప్పుడు దిలీప్ కుమార్గా ఉన్నప్పుడు ఆయన కుటుంబం చాలా కష్టాల్లో ఉండేది. ఆయన తల్లి ఎన్నో ఇబ్బందులు పడ్డారు. ఆ సమయంలో వారు ఇస్లాం మతాన్ని స్వీకరించాలని నిర్ణయించుకున్నారు. వర్మ విశ్లేషణ ప్రకారం.. వారు మతం మారిన కేవలం వారం లేదా నెల రోజుల్లోనే రెహమాన్కు తిరుగులేని అవకాశాలు రావడం మొదలైంది.
మ్యాజిక్ ఆ? లాజిక్ ఆ?: అది యాదృచ్ఛికంగా జరిగిందా లేక మతం మారినందుకే జరిగిందా అనేది పక్కన పెడితే.. రెహమాన్ మాత్రం అది ‘అల్లా’ ఇచ్చిన వరమని బలంగా నమ్మారు. ఆ నమ్మకమే ఆయన్ని అల్లాకు ఒక గొప్ప భక్తుడిగా మార్చేసింది.
ఆర్జీవీ మార్క్ ‘ఇన్సెంటివ్’ థియరీ!
మనుషులు ఒక మతం నుంచి ఇంకో మతానికి ఎందుకు మారతారు అనేదానికి వర్మ ఒక వింత కారణం చెప్పారు. మనుషులు ఎప్పుడైనా ఒక నమ్మకాన్ని ఎప్పుడు వదులుకుంటారు అంటే.. వారికి అక్కడ ఏదో ఒక ‘ఇన్సెంటివ్’ (లాభం) కనిపించినప్పుడు మాత్రమేనట. అది డబ్బు కావచ్చు లేదా రెహమాన్ లాగా ఏదైనా అద్భుతం జరగడం కావచ్చు. “నేను ఇన్నాళ్లు పూజించాను కానీ ఏమీ కాలేదు, సరే అది కూడా ట్రై చేద్దాం” అనే మానవ నైజమే మత మార్పిడిలకు మూలమని వర్మ విశ్లేషించారు.
దేవుడు vs వైరస్: అసలు భక్తుడు ఎవరు?
ఈ సందర్భంగా దేవుడు మరియు కరోనా వైరస్పై వర్మ చేసిన వ్యాఖ్యలు షాకింగ్గా ఉన్నాయి. అలాగే సృష్టికర్త ఎవరు? అని ప్రశ్నించారు. సృష్టిలో ప్రతిదీ దేవుడే సృష్టించాడు అనుకుంటే, మరి వైరస్ను ఎందుకు సృష్టించాడు?. అలాగే దేవుడికి మనుషుల మీద కంటే వైరస్ మీద ఎక్కువ ప్రేమ ఉందా? బహుశా వైరస్ మనకంటే గొప్పగా దేవుడిని పూజిస్తోందేమో, అందుకే దేవుడు దానికి ఎక్కువ మార్కులు వేస్తున్నాడేమో అని వర్మ ఎద్దేవా చేశారు.
మనుషులు మరియు వైరస్.. ఇద్దరూ ఒక్కటే!
వర్మ ప్రకారం.. ప్రపంచంలో తన నివాసాన్ని (Habitat) దాటి వేరే చోటికి వెళ్లి, అక్కడి వాతావరణాన్ని ధ్వంసం చేసే జాతులు రెండే రెండు. ఒకటి మనిషి, రెండోది వైరస్. మనుషులు ప్రకృతిని నాశనం చేస్తే, వైరస్ మనిషిని నాశనం చేస్తోంది. అందుకే ప్రస్తుతం జరుగుతున్నది దేశాల మధ్య యుద్ధం కాదు.. రెండు జాతుల మధ్య జరుగుతున్న ‘ప్రపంచ యుద్ధం’ అని ఆర్జీవీ ఈ స్టోరీని ముగించారు.
