కమల్ హాసన్ నెక్ట్స్ ఆ డైరక్టర్ తోనా? ఒక్క వార్త తో ఫ్యాన్ వార్ స్టార్ట్!!

టాలీవుడ్, కోలీవుడ్ వర్గాల్లో ఒక్కసారిగా హీట్ పెంచిన ఓ గాసిప్ ఇప్పుడు ఫ్యాన్ వార్స్‌కు దారి తీస్తోంది. వెట్రిమారన్, కమల్ హాసన్ కాంబినేషన్‌లో సినిమా వస్తుందా? అనే ప్రశ్నే ఇప్పుడు సోషల్ మీడియాలో పెద్ద చర్చగా మారింది. ఈ టాక్ ఎంతగా వైరల్ అయిందంటే, ఒకవైపు కమల్ అభిమానులు సంబరాలు చేసుకుంటుంటే… మరోవైపు ధనుష్ అభిమానులు తీవ్ర ఆగ్రహం వ్యక్తం చేస్తున్నారు.

‘థగ్ లైఫ్’ సినిమాకు ఆశించిన స్పందన రాకపోవడంతో కమల్ హాసన్ తదుపరి సినిమా విషయంలో ఇప్పటికీ స్పష్టత లేదు. రాజకీయ కార్యక్రమాల్లో బిజీగా ఉన్న ఆయన, పూర్తిస్థాయిలో సినిమాలపై ఫోకస్ పెట్టలేకపోతున్నారని ఇండస్ట్రీలో మాట వినిపిస్తోంది. ‘KH237’ అంటూ అంబరివ్‌తో సినిమా, అలాగే రజినీకాంత్‌తో రీయూనియన్ ప్రాజెక్ట్ అని కమల్ స్వయంగా ప్రకటించినా, నెలల తరబడి వాటిపై ఎలాంటి అప్‌డేట్స్ లేకపోవడం అనేక అనుమానాలకు దారి తీసింది.

ఇలాంటి పరిస్థితుల్లో, తాజాగా సోషల్ మీడియాలో మరో బలమైన బజ్ వినిపిస్తోంది. దర్శకుడు వెట్రిమారన్ కమల్ హాసన్‌కు ఓ కథ వినిపించాడట, అది కమల్‌కు బాగా నచ్చి గ్రీన్ సిగ్నల్ కూడా ఇచ్చారన్న కథనాలు ఊపందుకున్నాయి. ఈ ప్రాజెక్ట్ నిజమైతే, వెట్రిమారన్ ప్రస్తుతం సింబుతో చేస్తున్న ‘అరసన్’ పూర్తి అయిన తర్వాత షూటింగ్ మొదలయ్యే అవకాశాలు ఉన్నాయని గుసగుసలు వినిపిస్తున్నాయి. అయితే ఇవన్నీ ఇప్పటివరకు అధికారికంగా ఎవరూ ధృవీకరించలేదు.

ఈ వార్తలే ఇప్పుడు ధనుష్ అభిమానులను మండిపడేలా చేశాయి. వెట్రిమారన్ పేరు వినిపించగానే వాళ్లకు గుర్తొచ్చేది ఒక్కటే. ‘వడ చెన్నై’. ఈ సినిమాకు సీక్వెల్‌గా ‘వడ చెన్నై 2’ ఎప్పుడెప్పుడు మొదలవుతుందా అని ఫ్యాన్స్ ఏళ్లుగా ఎదురుచూస్తున్నారు. ‘అరసన్’ తర్వాత తప్పకుండా వడ చెన్నై 2 సెట్స్‌పైకి వెళ్తుందని వాళ్లు గట్టిగా నమ్మారు. అంతేకాదు, నిర్మాత Vels Film International కూడా వచ్చే ఏడాది సీక్వెల్ స్టార్ట్ చేస్తామని ప్రకటించడంతో ఆ నమ్మకం మరింత బలపడింది.

అలాంటి సమయంలో కమల్ హాసన్‌తో కొత్త సినిమా బజ్ రావడం, వడ చెన్నై 2 మళ్లీ వాయిదా పడుతుందేమో అన్న భయాన్ని అభిమానుల్లో పెంచింది. అందుకే సోషల్ మీడియాలో వెట్రిమారన్‌ను ఉద్దేశించి, “ముందు వడ చెన్నై 2 పూర్తి చేయండి” అంటూ పోస్టులు వెల్లువెత్తుతున్నాయి. కొందరు అభిమానులు అయితే ఈ ప్రాజెక్ట్‌ను పూర్తిగా డ్రాప్ చేయాలంటూ డిమాండ్ చేయడం కూడా గమనార్హం.

మరోవైపు కమల్ హాసన్ అభిమానులు మాత్రం ఈ టాక్‌ను ఘనంగా స్వాగతిస్తున్నారు. ‘విక్రమ్’ తర్వాత కమల్ సినిమాలు పెద్దగా ప్రభావం చూపలేకపోయిన నేపథ్యంలో, వెట్రిమారన్‌తో కలయిక ఆయనకు స్ట్రాంగ్ కంబ్యాక్ అవుతుందని వాళ్లు నమ్ముతున్నారు. ఇద్దరూ మాస్టర్ స్టోరీటెల్లర్స్ అని, ఈ కాంబినేషన్ కన్ఫర్మ్ అయితే బాక్సాఫీస్ దగ్గర గట్టి విజయం ఖాయమని అభిమానుల అభిప్రాయం.

మొత్తానికి, వెట్రిమారన్ – కమల్ హాసన్ సినిమా ప్రస్తుతం పక్కా ప్రాజెక్ట్ కాదు… కానీ ఈ రూమర్ మాత్రమే రెండు భారీ ఫ్యాన్ బేస్‌ల మధ్య హడావుడి రేపుతోంది. ఇది నిజంగా సెట్స్‌పైకి వెళ్తుందా? వడ చెన్నై 2 మరింత ఆలస్యం అవుతుందా? లేక ఇవన్నీ ఊహాగానాలేనా? అన్న ప్రశ్నలకు సమాధానం రావాలంటే అధికారిక ప్రకటన వచ్చే వరకూ ఎదురుచూడాల్సిందే. కానీ అప్పటివరకూ ఈ బజ్ మాత్రం తగ్గేలా కనిపించడం లేదు.