ఒక సినిమాకు సీక్వెల్ ప్లాన్ చేయటం అంటే బిజినెస్ పరంగా మంచి ఆలోచన. అదే సమయంలో మొదట పార్ట్ ని మ్యాచ్ చేసేలా ఉండేలా ప్లాన్ చేయటం మాత్రం చాలా కష్టం. ఇంతక ముందు వచ్చిన ‘మ్యాడ్’ ఎంత పెద్ద సక్సెస్ అయ్యిందో అందరికీ తెలిసిందే. ఆ సినిమాలోని క్యారక్టర్స్ ని , కథనాన్ని కొనసాగిస్తున్న తాజా చిత్రమే ‘మ్యాడ్ స్క్వేర్’. ఈ సీక్వెల్ హిట్ కొట్టిందా, ఈ సారి ఏ కథ ఎంచుకున్నారు. మొదటి సినిమా స్దాయి ఎంటర్టైన్మెంట్ ని పంచింది చూద్దాం.
కథ
ఫస్ట్ పార్ట్ ని గుర్తు చేస్తూ ఈ సినిమా ప్రారంభం అవుతుంది. మ్యాడ్ గ్యాంగ్ మనోజ్, అశోక్, దామోదర్ (నార్నే నితిన్, రామ్ నితిన్, సంగీత్ శోభన్) అంతా కాలేజీ చదువు పూర్తి చేసుకుని జీవితాల్లో పడతారు. కానీ అల్లరి, చిల్లరి పనులు మాత్రం మానరు. ఇదిలా ఉంటే.. లడ్డుకు పెళ్లి చేయాలని వాళ్ల నాన్న మురళీధర్ గౌడ్‌ ఎదురు కట్నం ఇచ్చి మరీ ఓ సంబంధం సెట్‌ చేస్తాడు. తన పెళ్లి గురించి ప్రెండ్స్ ఎవరికీ చెప్పకపోయినా వాళ్లంతా విషయం తెలుసుకుని దానికి హాజరు అవుతారు. అయితే ఆ పెళ్లి జరగదు. తాళి కట్టే సమయానికి పెళ్లికూతురు మరో కుర్రాడితో వెళ్లిపోవడంతో పెళ్లి కాన్సిల్ అవుతుంది.
ఈ క్రమంలో లడ్డుని ఆ బాధ నుంచి బయట పడేసేందుకు ప్రెండ్స్ అందరూ కలిసి గోవాకు తీసుకెళ్తారు. అయితే వాళ్లు అక్కడ మరో సమస్యలో పడతారు. అక్కడున్న మ్యూజియంలో ఓ విలువైన లాకెట్ దొంగతనం జరుగుతుంది. ఆ లాకెట్ ని గ్యాంగ్‌స్టర్‌ మ్యాక్స్‌ (సునీల్‌) నుంచి .. దామోదర్ అండ్‌ ఫ్రెండ్స్‌ గ్యాంగ్ చేతిలో పడుతుంది. దాంతో వాళ్ల వెనక మ్యాక్స్‌ పడతారు. మరో ప్రక్క పోలీస్ లు ఈ మ్యాడ్ గ్యాంగ్ ఆ దొంగతనం చేసిందని భావించి వీళ్లు వెనక పడుతూంటారు.
ఇదిలా ఉండగా ఒక ఘటనలో ఆ లాకెట్ లడ్డు దగ్గరకు వస్తుంది. దీంతో దానిని తిరిగి తెచ్చివ్వాలని లడ్డు తండ్రిని మ్యాక్స్‌ కిడ్నాప్‌ చేస్తాడు. ఈ కేసును చేధించేందుకు ఒక ఐపీఎస్‌ను ప్రభుత్వం ఏర్పాటు చేస్తుంది. ఆ తర్వాత ఏమైంది? ఒకవైపు పోలీసులు, మరోవైపు నుంచి ఎలాంటి ఇబ్బందులు ఎదుర్కొన్నారు?వాటి నుంచి ఎలా బయటపడ్డారు?అన్నది చిత్ర కథ.
ఎనాలసిస్ ..
కామెడీ రాయటం కష్టం. దాన్ని పండించటం మరీ కష్టం. అందుకే చాలా మంది ఆ జానర్ జోలికి పోరు. కానీ కామెడీ వర్కవుట్ అయితే భారీగా ఫ్యామీలిలతో కలిసి చూస్తారు. అలాగే కామెడీ అంటే వరస పెట్టి పేల్చే జోక్ లు కాదు. ఆ జోక్ లను కలిపే కథ బలంగా ఉండాలి. ఎమోషన్స్ డ్రైవ్ చేయాలి. అప్పుడే నిజమైన ఫన్ పడుతుంది. లేకపోతే ఇదిగో ఈ సినిమాలాగ తయారవుతుంది. చూస్తున్నంతసేపు నవ్వు వస్తుంది. తర్వాత ఏం చూసాం అంటే చెప్పలేం.
ఈ సినిమాని కేవలం రెండు చిన్న ఇన్సిడెంట్స్‌ను బేస్‌ చేసుకుని రాసుకున్నారు. మొదట లడ్డు పెళ్లి ఆగిపోవటం, గోవా వెళ్లటం, గోవాలో లాకెట్ మిస్సవటం, దాని వెనక గ్యాంగస్టర్స్, పోలీస్ లు పడటం. నిజానికి ఇందులో జెన్యూన్ కామెడీ ఆఫ్ ఎర్రర్స్ కనపడవు. దానికి తోడు ఎక్కడా ఎమోషన్స్ లేకపోవటం, కథలో బలమైన డ్రామా లేకపోవడం.. సెకండాఫ్ సాగతీతగా ఉన్నట్లు అనిపిస్తుంది. మొదటి పార్ట్ లాగానే లడ్డూ పాయింటాఫ్ వ్యూలోనే కథ ప్రారంభం అవుతుంది.
వరుస పంచ్‌లతో ఫస్టాఫ్ నవ్విస్తారు. అయితే సెకండాఫ్ కు వచ్చేసరికే కథ లో విషయం తక్కువై వినోదం పండటం తగ్గిపోతుంది. గోవా షిఫ్ట్‌ అయ్యాక కామెడీ డోస్ స్పీడ్‌ పెంచాడు దర్శకుడు. అయితే అది వేరే దారిలో వెళ్తున్నట్లు అనిపిస్తుంది. ఫస్ట్ పార్ట్ లో లాగానే మ్యాడ్ గ్యాంగ్‌కు ఉన్న చిన్న చిన్న లవ్‌స్టోరీలు.. వాళ్లు కాలేజీలో చేసే అల్లరి, హంగామా ఉంటాయనుకుంటే పెద్ద నిరాశ ఎదురౌతుంది.
టెక్నికల్ గా..
పైనే అనుకున్నట్లు ఈ సినిమాకు స్క్రిప్టే ప్రధాన సమస్య. అయితే దర్శకుడు కళ్యాణ్ శంకర్ జోక్స్ ని బాగా రాసుకున్నారు. దాంతో కొన్ని చోట్ల బాగా నవ్వుతాం. ఆర్టిస్ట్ లు కూడా ఆ జోక్స్ ని బాగానే పేల్చారు. దానికి భీమ్స్ సంగీతం, తమన్‌ బ్యాక్ గ్రౌండ్ స్కోర్ సినిమాకు ప్లస్ లుగా నిలిచాయి. షామ్‌దత్‌ కెమెరా వర్క్ బాగుంది. ప్రొడక్షన్ వాల్యూస్ బాగున్నాయి.
నటీనటుల్లో …నార్నే నితిన్, సంగీత్ శోభన్, మనోజ్ తమకు అలవాటైన పాత్రల్లో చక్కగా ఒదిగిపోయారు. రఘుబాబు, మురళీధర్ గౌడ్‌లు తమ పాత్రల పరిధి మేరకు నవ్వులు పంచారు. జాతిరత్నాలు దర్శకుడు అనుదీప్ మరోసారి గెస్ట్ రోల్ లో కనిపించింది నవ్వించే ప్రయత్నం చేసారు.
చూడచ్చా
నవ్వులు కోసం, ఫన్ తో వచ్చే పంచ్ డైలాగ్స్ కోసం చూడచ్చు. కథ ఎక్సపెక్ట్ చేస్తే మాత్రం ఇలా ఉందేంటి ఈ సినిమా అనిపిస్తుంది.
నటీనటులు: నార్నె నితిన్, సంగీత్ శోభన్, రామ్ నితిన్, శుభలేఖ సుధాకర్‌, మురళీధర్ గౌడ్‌, తదితరులు
నిర్మాణ సంస్థలు: సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్‌
నిర్మాతలు: సూర్యదేవర హారిక, సాయి సౌజన్య
సమర్పకులు: ఎస్. నాగ వంశీ
ఎడిటింగ్: నవీన్ నూలి
దర్శకత్వం, కథ: కల్యాణ్‌ శంకర్
సంగీతం: భీమ్స్ సిసిరోలియో, తమన్‌
సినిమాటోగ్రఫీ: శామ్‌దత్
విడుదల: మార్చి 28, 2025
