మెగా హీరోలతో తనకు ఉన్న బలమైన అనుబంధంతో ఎప్పుడూ వార్తల్లో నిలిచే మారుతి, ఈసారి ఓ కొత్త లెక్క మొదలుపెట్టాడట. గతంలో సాయి ధరమ్ తేజ్‌తో ‘ప్రతిరోజూ పండగే’ అనే సినిమా చేసి బాక్సాఫీస్ వద్ద మంచి విజయం సాధించిన మారుతి, ఇప్పుడు మళ్లీ అదే హీరో కోసం ఓ కొత్త కథ రెడీ చేశాడు. కానీ ఇక్కడ ట్విస్ట్ ఏంటంటే — ఈసారి ఆయన దర్శకుడు కాదు, నిర్మాత మాత్రమే!
సాయిధరమ్ కోసం మారుతి రాసిన ఈ కథను, తాజాగా ‘టైగర్ నాగేశ్వరరావు’ తీసిన వంశీకి అప్పగించారట. ఆ సినిమా బాక్సాఫీస్ వద్ద ఫ్లాప్ అయిన తర్వాత వంశీ ఖాళీగా ఉన్నప్పుడు, మారుతి స్క్రిప్ట్ అతడి చేతుల్లో పడటం ఇప్పుడు టాక్ ఆఫ్ ది టౌన్ అయ్యింది. అంతే కాదు, మారుతి ఈ ప్రాజెక్ట్‌కి సూపర్వైజర్‌గా ఉంటూ, కథనం, మాటలు, డైరెక్షన్ పర్యవేక్షణ అన్నీ తనే చూసుకుంటారని కూడా వార్తలు వినిపిస్తున్నాయి.
ఇక సాయి ధరమ్ తేజ్ విషయానికి వస్తే, ప్రస్తుతం ‘సంబరాల ఏటి గట్టు’ తో బిజీగా ఉన్నాడు. ఆ సినిమా పూర్తయ్యాకే ఈ ప్రాజెక్ట్ మొదలవుతుందట.
అయితే, ఈ సారి మారుతి ఎందుకు డైరెక్టర్ కుర్చీ వదిలేశాడు? మెగా హీరోకి కథ మాత్రమే ఇవ్వడం వెనుక ఏదైనా పెద్ద లెక్కుందా? లేక వంశీకి కొత్త ఛాన్స్ ఇవ్వాలనుకున్నారా? అన్న చర్చే ఇప్పుడు ఇండస్ట్రీలో హాట్ టాపిక్.
ఇదే కాకుండా, మారుతి బ్యానర్‌లో మరో ఐదు సినిమాలు కూడా లైన్లో ఉన్నాయని, వాటి ప్రీ-ప్రొడక్షన్ పనులు జోరుగా సాగుతున్నాయని టాక్.
