‘ధురంధర్’ కు 100 కోట్ల నష్టం?

సాధారణంగా ఓ సినిమా ఎంత పెద్ద హిట్ అయ్యిందో చెప్పడానికి కలెక్షన్లే ఆధారం అవుతాయి. కానీ ‘ధురంధర్’ విషయంలో మాత్రం లెక్కలు ఒక ప్రశ్నగా మారాయి. ఇంత బలమైన వసూళ్లు, ఇంత స్ట్రాంగ్ రన్ ఉన్నప్పటికీ… “ఇంకా ఎంత దూరం వెళ్లేదో?” అనే చర్చకు ఈ సినిమా కారణమైంది. ఎందుకంటే ‘ధురంధర్’ బాక్సాఫీస్ ప్రయాణంలో ఒక పెద్ద మార్కెట్ పూర్తిగా మిస్సైంది.

భారత్‌లోనే కాదు, ఓవర్సీస్‌లో కూడా ‘ధురంధర్’ అద్భుతమైన ప్రదర్శన చూపిస్తోంది. ఇప్పటికే ప్రపంచవ్యాప్తంగా 800 కోట్ల గ్రాస్‌ను దాటిన ఈ సినిమా, వెయ్యి కోట్ల క్లబ్ వైపు దూసుకుపోతోంది. ముఖ్యంగా అమెరికా మార్కెట్‌లో ఈ సినిమా సాధించిన విజయం ట్రేడ్ వర్గాలను ఆశ్చర్యపరిచింది. యూఎస్‌లో ఇప్పటివరకు 100 కోట్లకు పైగా గ్రాస్ వసూలు చేసిన ‘ధురంధర్’, ఫుల్ రన్‌లో మరో 30 కోట్ల వరకు జోడించే అవకాశం ఉందని అంచనాలు ఉన్నాయి.

ఇక్కడే అసలు ట్విస్ట్. సాధారణంగా బాలీవుడ్ సినిమాలకు గల్ఫ్ మార్కెట్ అమెరికాతో సమానంగా, కొన్నిసార్లు మరింత బలమైన మార్కెట్‌గా ఉంటుంది. పెద్ద స్టార్ సినిమాలు గల్ఫ్‌లో 10 మిలియన్ డాలర్ల మార్క్‌ను దాటడం కొత్త విషయం కాదు. కానీ ‘ధురంధర్’కు ఆ అవకాశం దక్కలేదు. గల్ఫ్ దేశాల్లో వచ్చిన బ్యాన్ కారణంగా సినిమా అక్కడ విడుదలే కాలేదు. ట్రేడ్ నిపుణుల అంచనా ప్రకారం, గల్ఫ్‌లో రిలీజ్ అయ్యి ఉంటే ‘ధురంధర్’ అక్కడ కూడా 100 కోట్ల గ్రాస్‌ను సులువుగా దాటేదని చెబుతున్నారు. అంటే కేవలం ఈ ఒక్క మార్కెట్ మిస్ అవ్వడం వల్లనే సినిమా దాదాపు 100 కోట్ల గ్రాస్‌ను కోల్పోయినట్టే.

ఇప్పటికే గల్ఫ్ రిలీజ్ లేకుండానే ‘ధురంధర్’ వెయ్యి కోట్ల దిశగా ప్రయాణిస్తోంది. ప్రస్తుతం హిందీ సినిమాల్లో జవాన్, పుష్ప 2 కలిసి 1050 కోట్ల గ్రాస్‌తో టాప్ పొజిషన్‌లో ఉన్నాయి. ‘ధురంధర్’ ఇప్పుడు అదే రికార్డును ఛేదించే ప్రయత్నంలో ఉంది. గల్ఫ్ మార్కెట్ అందుబాటులో ఉండి ఉంటే, ఈ రికార్డు కేవలం బ్రేక్ కాకుండా, చాలా కంఫర్టబుల్ మార్జిన్‌తో దాటిపోయేదన్న అభిప్రాయం వినిపిస్తోంది.

ఫైనల్‌గా చూస్తే, ‘ధురంధర్’ బాక్సాఫీస్ ప్రయాణం ఒక అరుదైన ఉదాహరణ. ఒకవైపు భారీ బ్యాన్ అడ్డంకి, మరోవైపు అన్ని మిగతా మార్కెట్లలో ఆపలేని దూకుడు. 100 కోట్ల నష్టం ఎదురైనా, వెయ్యి కోట్ల క్లబ్‌ను లక్ష్యంగా పెట్టుకున్న సినిమా ఇది. అదే ‘ధురంధర్’ నిజమైన బలం. లెక్కల్లో కాదు, లెక్కలు లేకపోయినా రికార్డుల్ని టచ్ చేసే సినిమా అన్న మాట.