నటులు తెరపై ప్రవర్తనకు, తెర వెనక ప్రవర్తనకు చాలా తేడా ఉంటుంది. నాని నటించిన దసరాతో తెలుగు పరిశ్రమకు దొరికిన విలన్ షైన్ టామ్ చాకో. మలయాళ ఇండస్ట్రీ నుండి వచ్చిన షైన్.. తన యాక్టింగ్‌తో తమిళ తంబీలను, టీఎఫ్ఐ ఆడియన్స్‌ను ఆకట్టుకున్నాడు.
తెలుగులో రంగబలి, దేవర, ఢాకూ మహారాజ్, రీసెంట్లీ రాబిన్ హుడ్‌తో పలకరించాడు. తెరపై మస్త్ షేడ్స్ చూపించే ఈ మాలీవుడ్ యాక్టర్.. నిజ జీవితంలో మాత్రం వివాదాల్లో ఇరుక్కుంటున్నారు.
సినిమా సెట్‌లో డ్రగ్స్ తీసుకుని అసభ్యకరంగా ప్రవర్తించాడని నటి విన్సీ అలోషియస్, నటుడు షైన్ టామ్ చాకోపై ఫిర్యాదు చేశారు. షైన్ పై విన్సీ కేరళ ఫిలిం ఛాంబర్ కి, ‘అమ్మ’ అసోసియేషన్ కి ఫిర్యాదు చేసింది.
ఫిర్యాదును పరిశీలించడానికి సోమవారం ఛాంబర్ మానిటరింగ్ కమిటీ అత్యవసర సమావేశం నిర్వహించనుంది. ‘సూత్రవాక్యం’ సినిమా సెట్‌లో ఈ ఘటన జరిగింది. త్వరలో విడుదల కానున్న సినిమా ఇది.
సినిమా సెట్‌లో తన సహనటుడు డ్రగ్స్ తీసుకుని అసభ్యంగా ప్రవర్తించాడని విన్సీ ఇటీవల వెల్లడించింది. కేసు నమోదు చేయడానికి తగిన సమాచారం లభిస్తే తదుపరి చర్యలు తీసుకుంటామని ఎక్సైజ్ అధికారులు తెలిపారు.
నటి వెల్లడించిన విషయంపై స్టేట్ ఇంటెలిజెన్స్ కూడా విచారణ ప్రారంభించింది. విన్సీ నుంచి ఫిర్యాదు తీసుకుని కేసు నమోదు చేయడానికి పోలీసులు కూడా ప్రయత్నాలు ప్రారంభించారు.
డ్రగ్స్ తీసుకునే వారితో నటించనని విన్సీ అలోషియస్ ఇటీవల చెప్పిన వీడియో వైరల్ అయ్యింది. దీని తర్వాత నటిపై సైబర్ దాడి కూడా జరిగింది.
ఈ నిర్ణయం తీసుకోవడానికి గల కారణాన్ని వివరిస్తూ విన్సీ సోషల్ మీడియాలో పోస్ట్ చేసిన వీడియో కూడా వైరల్ అయ్యింది. ఒక ప్రముఖ నటుడు సినిమా సెట్‌లో బహిరంగంగా డ్రగ్స్ తీసుకుని ఇబ్బంది పెట్టాడని ఆ వీడియోలో విన్సీ చెప్పింది. ఆ నటుడు ఎవరో ఇప్పుడు విన్సీ వెల్లడించింది.
