బాలీవుడ్ బాద్‌షా షారుక్ ఖాన్‌ని డైరెక్ట్ చేయటం అంటే మాటలు కాదు… అది ధైర్యం, విజన్, లెగసీకి చిహ్నం!” అలాంటి భారీ సవాల్‌కి సిద్ధమవుతున్నది ఎవరో తెలుసా? ఆయన కుమారుడు— ఆర్యన్ ఖాన్! తండ్రి షారుక్ ఖాన్ లా గ్లామర్‌లో కాదు, వెనకనుండి కెమెరా వెనుక నిలబడి తన సొంత ఐడెంటిటీని నిర్మించుకుంటున్న కొడుకు ఆర్యన్.
తన డైరెక్టోరియల్‌ డెబ్యూ ‘ది బ్యాడ్స్ ఆఫ్ బాలీవుడ్’ తో ఆర్యన్ ఇప్పటికే బాలీవుడ్‌కి “ఇదిగో కొత్త జెనరేషన్ ఫిల్మ్ మేకర్” అని చూపించాడు. నెట్‌ఫ్లిక్స్‌లో స్ట్రీమ్‌ అయిన ఈ వెబ్ సిరీస్ యూత్ నుంచి క్రిటిక్స్‌ వరకు అందరి ప్రశంసలు దక్కించుకుంది. స్టోరీటెల్లింగ్‌, టోన్‌, విజువల్‌ ట్రీట్‌ — అన్నీ హాలీవుడ్‌ లెవల్‌లో ఉన్నాయని చెప్పాల్సిందే.
ఇప్పుడు ఆయన మరో అడుగు ముందుకు వేస్తున్నారు — తన తండ్రి షారుక్ ఖాన్‌నే హీరోగా తీసుకుని ఒక ఫీచర్‌ ఫిల్మ్ తెరకెక్కించాలనే ఆలోచనలో ఉన్నారని బాలీవుడ్ వర్గాలు చెబుతున్నాయి.
ఇక “జవాన్”, “పఠాన్” లాంటి భారీ హిట్స్‌ ఇచ్చిన తర్వాత షారుక్ సినిమాల ఎంపికలో చాలా జాగ్రత్తగా ఉన్నాడు. ప్రస్తుతం ఆయన సిద్ధార్థ్ ఆనంద్ దర్శకత్వంలోని ‘కింగ్’ షూటింగ్‌లో బిజీగా ఉన్నారు, ఇది 2026లో రిలీజ్ అవుతుంది.
అయితే, ఆ తర్వాతి ప్రాజెక్ట్‌గా షారుక్ – ఆర్యన్ ఫాదర్ & సన్ కాంబో అనౌన్స్ అయ్యే అవకాశం ఉందని బాలీవుడ్ టాక్‌. ఇది కేవలం సినిమా కాదు — ఒక ఎమోషనల్ లెగసీ, ఒక తరం నుండి మరో తరానికి బాద్‌షా సింహాసనం బదిలీ అవుతున్న క్షణం!
ఆర్యన్ మాట్లాడుతూ…. సినిమా నిర్మాణం పట్ల నాన్నకు (షారుఖ్ ఖాన్) అపారమైన పరిజ్ఞానం ఉంది. వీఎఫ్ఎక్స్, లైటింగ్, కెమెరా పనితీరు… ఇలా ప్రతి సాంకేతిక అంశం గురించి ఆయన చాలా లోతుగా అధ్యయనం చేశారు. నేను చిన్నపిల్లాడిగా ఉన్నప్పుడు షూటింగ్ సెట్స్‌కు వెళ్లినప్పుడల్లా ఆయన నాకు ఎన్నో టెక్నికల్ విషయాలు చూపించేవారు అని ఆర్యన్ తెలిపాడు.
షూటింగ్ సమయంలో నిజంగా బుల్లెట్ తగలదు.. కానీ దాన్ని తెరపై ఎలా చూపిస్తారు, లేదంటే విమానం ఎగరనప్పటికీ అది ఆకాశంలో ప్రయాణిస్తున్నట్లు ఎలా చిత్రీకరిస్తారు వంటి విషయాలను ఆయన నాకు వివరించేవారు. ఒక చిన్న పిల్లాడికి ఆ టెక్నిక్స్ అన్నీ చూస్తే అద్భుతంలా అనిపించేవి. అలా చిన్నప్పటి నుంచే నాలో ఫిల్మ్ మేకింగ్‌పై ఆసక్తి పెరిగింది అని ఆర్యన్ తన తండ్రి స్ఫూర్తిని గుర్తుచేసుకున్నారు.
లాక్‌డౌన్‌లో ఫ్యామిలీ షార్ట్ ఫిల్మ్:
లాక్‌డౌన్ సమయాన్ని తమ కుటుంబం ఎలా గడిపిందో కూడా ఆర్యన్ పంచుకున్నాడు. లాక్‌డౌన్ సమయంలో దాదాపు రెండేళ్ల పాటు పెద్దగా పని లేకపోవడంతో నేను నాన్న, చెల్లి సుహానా ఖాన్ కలిసి ఒక కథ రాసుకున్నాం. దాన్ని మా ఇంట్లోనే షార్ట్ ఫిల్మ్‌గా చిత్రీకరించాం అని వెల్లడించాడు. ఆ షార్ట్ ఫిల్మ్‌లో షారుఖ్, సుహానా నటీనటులుగా వ్యవహరించగా తాను సినిమాటోగ్రాఫర్ (డీఓపీ)గా పనిచేశానని ఆర్యన్ చెప్పుకోచ్చాడు.
తన తొలి సిరీస్ విజయంపై ఆర్యన్ ఖాన్ స్పందిస్తూ ఈ సిరీస్‌లో మాపై (బాలీవుడ్ ప్రముఖులపై) మేమే సెటైర్లు వేసుకోవాలని నిర్ణయించుకున్నాం. అయితే ఎక్కడా కూడా ఎవరినీ అగౌరవపరచకూడదని హద్దులు దాటకుండా చూసుకోవాలని భావించాం.
ఇండస్ట్రీలో ఉంటూ ఇండస్ట్రీ గురించే కథను చెప్పేటప్పుడు ఆ గౌరవాన్ని తప్పకుండా పాటించాలి. ఈ కామెడీలో ముఖ్యమైన విషయం ఏమిటంటే… మనల్ని మనం విమర్శించుకోగలిగే స్పోర్టివ్ నెస్ ఉండాలి. ఇండస్ట్రీలోని వారందరూ మా సిరీస్‌ను చాలా సానుకూలంగా తీసుకున్నారు అని ఆర్యన్ ఖాన్ వివరించారు.
