మోహన్ లాల్ ‘ ఎల్2 :ఎంపురాన్’ గత శుక్రవారం (మార్చి 28) విడుదలై యావరేజ్ టాక్ తెచ్చుకుంది. పృథ్వీరాజ్ సుకుమారన్ దర్శకత్వం వహించిన ఈ చిత్రానికి కేరళలో కలెక్షన్స్ బాగున్నాయి. ఇప్పటివరకు కేరళలో మొదటి రోజే అత్యధిక వసూళ్లు సాధించిన చిత్రంగా ఎంపురాన్ నిలిచింది.
అయితే కొన్ని మితవాద సంఘాలు, పార్టీలు ఈ సినిమాపై తీవ్ర అభ్యంతరాలు వ్యక్తం చేశాయి.
ఈ సినిమాలో బాబా అనే వ్యక్తి గర్భిణీ ముస్లిం మహిళను చంపే సన్నివేశం గోద్రా ఊచకోత తర్వాత జరిగిన సంఘటనలను గుర్తుకు తెస్తుందని ఆరోపణలు వచ్చాయి. ఈ సినిమాపై కోర్టుకు కూడా వెళ్లారు.
‘ఎంపురాన్’ సినిమా బిజెపికి, హిందూత్వ వాదులకు వ్యతిరేకంగా నిర్మించబడిందని ఆరోపణలు వచ్చాయి. ఈ ఆరోపణలు వచ్చిన తర్వాత నటుడు మోహన్ లాల్ క్షమాపణలు చెప్పారు. సోషల్ మీడియాలో ఒక సందేశాన్ని పోస్ట్ చేసిన మోహన్ లాల్, ఎవరి మనోభావాలను దెబ్బతీయడం తన ఉద్దేశ్యం కాదని అన్నారు. అభ్యంతరకరమైన సన్నివేశాలను తొలగిస్తామని సూచించారు.ఇప్పటికే దీనిపై స్పందించిన దర్శక, నిర్మాతలు మరోసారి సెన్సార్‌ బోర్డును ఆశ్రయించారు. ఈ మేరకు సెన్సార్‌ బోర్డు.. పలు సన్నివేశాలకు సంబంధించి 24 ‘కట్స్‌’ చెప్పింది.
ఎంపురాన్ సినిమాలోని చాలా సన్నివేశాలను కట్ చేశారు. కొన్ని పాత్రల పేర్లను మార్చారు. కొన్ని చోట్ల సంభాషణలు మ్యూట్ చేశారు. అలాగే కొన్ని చోట్ల నేపథ్య సంగీతాన్ని మార్చారు, సినిమాలో మొత్తం 24 మార్పులు చేశారు. ఈ మార్పుల్లో ప్రధానంగా సురేష్ గోపీ కు వేసిన థాంక్స్ కార్డ్ ని తొలిగించటం హాట్ టాపిక్ గా మారింది.
ఈ చిత్రం నిర్మాణ సమయంలో చిత్రనిర్మాతలకు సహాయం చేసిన సురేష్ గోపి, ఈ వివాదం వచ్చిన తర్వాత తన పేరును క్రెడిట్‌ల నుండి తొలగించమని వ్యక్తిగతంగా అభ్యర్థించినట్లు మళయాళ పరిశ్రమలో వార్తలు వస్తున్నాయి. సురేష్ గోపీ బిజేపీ పార్టీకి చెందినవారు కావటంతో ఈ వివాదంలో ఇరుక్కోవటం ఇష్టలేకపోయిందని, ఆయన భయపడ్డారని, అందుకే పేరు తీసేయమన్నారని సోషల్ మీడియాలో వార్తలు మొదలయ్యాయి.
