ఇళయరాజా (Ilaiyaraaja) ఇండస్ట్రీకి వచ్చి 50 ఏళ్లు పూర్తి చేసుకోనున్నారు. ఈసందర్భంగా తమిళనాడు ప్రభుత్వం కీలక ప్రకటన చేసింది. ఈ మ్యూజిక్‌ మ్యాస్ట్రో 50 ఏళ్ల జర్నీని ఘనంగా నిర్వహించాలని నిర్ణయించింది. లండన్‌ పర్యటన పూర్తిచేసుకున్న ఇళయరాజాను సీఎం స్టాలిన్‌ (MK Stalin) కలిశారు. ఈవిషయాన్ని పంచుకున్న సీఎం ఎక్స్‌లో ఇందుకు సంబంధించిన వీడియోను పోస్ట్‌ చేశారు.
ఇళయరాజా అర్ధశతాబ్దపు సంగీత ప్రయాణాన్ని ప్రభుత్వం తరఫున ఘనంగా నిర్వహించనున్నట్లు తెలిపారు. ఈ వేడుకలో అభిమానులంతా భాగం కావాలని కోరారు. ఇది అందరి వేడుక అని పేర్కొన్నారు.
మరోవైపు ‘సింఫొని’ కార్యక్రమాన్ని 13 దేశాల్లో నిర్వహించడానికి ఒప్పందం కుదిరినట్టు ఇళయరాజా తాజాగా వెల్లడించారు. మార్చి 9న లండన్‌లో ‘సింఫొని’ సంగీత కార్యక్రమాన్ని ఘనంగా నిర్వహించారు.
ఇళయరాజా మాట్లాడుతూ.. దుబాయ్, ప్యారిస్‌ తదితర చోట్ల ఈ కార్యక్రమాన్ని నిర్వహించడానికి ఏర్పాట్లుచేసినట్లు తెలిపారు. తన ‘సింఫొని’ కార్యక్రమాన్ని డౌన్‌లోడ్‌ చేసుకొని వినవద్దని, తనను కొనియాడేవారు ప్రత్యక్షంగా ‘సింఫొని’ సంగీతాన్ని వినాలని విజ్ఞప్తి చేశారు. 82 ఏళ్లలో తాను ఏం చేస్తానని అనుకోవద్దని, ఇకపైనే ఆట ఆరంభిస్తున్నానని పేర్కొన్నారు.
1943లో జన్మించిన ఇళయరాజా ఇప్పటివరకు వివిధ భాషల్లో 1000 సినిమాలకు పైగా సంగీతం అందించారు. ఎన్నో అవార్డులను తన సొంతం చేసుకున్నారు. 1976లో అన్నాకిలి అనే తమిళ సినిమాకు స్వరాలు అందించారు. అప్పటినుంచి ఇప్పటివరకూ తన సంగీతంతో ప్రేక్షకులను మైమరపిస్తున్నారు.
