బాలీవుడ్ సీనియర్ నటుడు సంజయ్ దత్ మరోసారి వార్తల్లో నిలిచారు. ఈసారి తన సినిమా వల్ల కాదు, పబ్లిక్ లో ఆయన ప్రవర్తించిన తీరు వల్ల సోషల్ మీడియాలో విమర్శలు ఎదుర్కొంటున్నారు. ఫ్యామిలీతో కలిసి డిన్నర్కు వెళ్ళిన సమయంలో కెమెరామెన్లు చుట్టుముట్టడంతో సంజయ్ దత్ సహనం కోల్పోయారు. తన భార్య మాన్యత, పిల్లల ముందే ప్యాపరాజీలపై నోరు పారేసుకున్న వీడియో ఇప్పుడు నెట్టింట సెన్సేషన్గా మారింది. రణవీర్ సింగ్ ‘ధురంధర్ 2’ సక్సెస్ను ఎంజాయ్ చేస్తున్న సమయంలోనే సంజూ బాబా ఇలా వివాదంలో చిక్కుకోవడం బాలీవుడ్ లో హాట్ టాపిక్గా మారింది.
“బస్ కర్నా బే..” అంటూ వార్నింగ్!
ముంబైలోని ఒక ఫేమస్ రెస్టారెంట్ నుంచి బయటకు వస్తున్న సమయంలో ఫోటోగ్రాఫర్లు సంజయ్ దత్ను క్లిక్ మనిపించేందుకు ప్రయత్నించారు. అయితే తన ప్రైవసీకి భంగం కలుగుతోందని భావించిన ఆయన, ఒక్కసారిగా కోపంతో ఊగిపోయారు. “బస్ కర్నా బే” (ఆపండిరా బాబు) అంటూ అసహనం వ్యక్తం చేస్తూ బూతులుతో తిట్టిపోసారని తెలుస్తోంది. ఫ్యామిలీతో ఉన్నప్పుడు కూడా ఇలా వెంటాడటం ఏంటని ఆయన ఆగ్రహం వ్యక్తం చేయడం ఇప్పుడు చర్చకు దారితీసింది. కొందరు సంజయ్ దత్ కు మద్దతుగా నిలుస్తుంటే, మరికొందరు మాత్రం అంతలా రియాక్ట్ అవ్వాల్సిన అవసరం లేదని కామెంట్స్ చేస్తున్నారు.
నోరా ఫతేహీతో సాంగ్ వివాదం.. పోలీస్ కంప్లైంట్!
కేవలం ప్యాపరాజీల మీద కోపమే కాదు, సంజయ్ దత్ చుట్టూ మరో పెద్ద వివాదం ముసురుకుంది. ‘KD: ది డెవిల్’ సినిమాలోని “సర్కే చునార్” పాటలో లిరిక్స్ అత్యంత అభ్యంతరకరంగా ఉన్నాయంటూ ఢిల్లీ పోలీసులకు ఫిర్యాదు అందింది. ఈ పాటలో మహిళలను కించపరిచేలా పదాలు ఉన్నాయని నేషనల్ కమిషన్ ఫర్ ఉమెన్ (NCW) కూడా సీరియస్ అయింది. ఈ క్రమంలో సంజయ్ దత్, నోరా ఫతేహీలకు నోటీసులు వెళ్ళడం, సెన్సార్ బోర్డును వివరణ కోరడం ఇండస్ట్రీలో కలకలం రేపింది. దీంతో మేకర్స్ ఆ పాట హిందీ వెర్షన్ను యూట్యూబ్ నుంచి తొలగించాల్సి వచ్చింది.
1000 కోట్లకు పైగా కలెక్షన్లు.. రికార్డుల వేటలో ‘ధురంధర్ 2’!
ఒకవైపు వివాదాలు చుట్టుముడుతున్నా, సంజయ్ దత్ నటించిన ‘ధురంధర్: ది రివెంజ్’ (ధురంధర్ 2) బాక్సాఫీస్ వద్ద సునామీ సృష్టిస్తోంది. ఈ స్పై థ్రిల్లర్ ప్రపంచవ్యాప్తంగా ఇప్పటికే రూ. 1067 కోట్లు కొల్లగొట్టి రికార్డులు తిరగరాస్తోంది. ఇందులో ఎస్ఎస్పీ చౌదరి అస్లాం పాత్రలో సంజయ్ దత్ నటనకు ప్రేక్షకులు ఫిదా అవుతున్నారు. ఆదిత్య ధర్ దర్శకత్వంలో వచ్చిన ఈ సినిమా వివాదాలను, బ్యాన్లను తట్టుకుని మరీ ఈ స్థాయి కలెక్షన్లు రాబట్టడం విశేషం.
మొత్తానికి సంజయ్ దత్ ఒకవైపు సక్సెస్ను ఎంజాయ్ చేస్తూనే, మరోవైపు తన కోపంతో, వివాదాస్పద పాటలతో సోషల్ మీడియాలో చర్చకు కేంద్రబిందువుగా మారారు. రాబోయే రోజుల్లో ‘రాజా శివాజీ’, ‘బాప్’ వంటి సినిమాలతో ఆయన మరిన్ని సంచలనాలు సృష్టించబోతున్నారు.
