ఈ ఏడాది సంక్రాంతి రేసులో ‘అనగనగా ఒక రాజు’ సినిమాతో బాక్సాఫీస్ వద్ద నవీన్ పొలిశెట్టి మరోసారి తన మ్యాజిక్ రిపీట్ చేశారు. సినిమా సూపర్ హిట్ టాక్ సొంతం చేసుకోవడంతో నవీన్ ఇండస్ట్రీలో తన స్థానాన్ని మరింత సుస్థిరం చేసుకున్నారు. అయితే, ఈ విజయోత్సవ సమయంలో నవీన్ తండ్రి తన కొడుకు ప్రయాణం గురించి చేసిన వ్యాఖ్యలు ప్రతి ఒక్కరినీ కదిలిస్తున్నాయి.
ఒక్క రాత్రిలో తీసుకున్న సాహసోపేత నిర్ణయం!
నవీన్ తండ్రి తాజాగా మాట్లాడుతూ, తమ కుటుంబం అంతా చదువుకు ప్రాముఖ్యత ఇచ్చే ఐఐటియన్స్ (IITians) తో నిండి ఉందని గుర్తుచేశారు. “నవీన్ కూడా చాలా ప్రతిభావంతుడు. లండన్లో సాఫ్ట్వేర్ ఇంజనీర్గా గొప్ప జీతంతో మంచి ఉద్యోగం చేసేవాడు. కానీ, ఒక రాత్రికి రాత్రే తన ఉద్యోగాన్ని వదిలేసి సినిమా ఇండస్ట్రీలోకి వెళ్తానని నిర్ణయం తీసుకున్నాడు” అని ఆయన తెలిపారు.
తండ్రిగా ఇది గర్వపడే క్షణం!
లండన్ లాంటి చోట ఉన్నతమైన కెరీర్ ఉన్నా, తన కలను నిజం చేసుకోవడానికి నవీన్ ఇండియాకు తిరిగి రావాలని నిర్ణయించుకోవడం అప్పట్లో అందరినీ ఆశ్చర్యానికి గురిచేసింది. ఈ రోజు ‘అనగనగా ఒక రాజు’ విజయంతో పాటు ప్రేక్షకుల అభిమానాన్ని చూస్తుంటే చాలా గర్వంగా ఉందని ఆయన తండ్రి భావోద్వేగానికి లోనయ్యారు. “తను తీసుకున్న ఆ నిర్ణయం ఈ రోజు మా అందరికీ ఒక ప్రౌడ్ మూమెంట్ (Proud Moment) మిగిల్చింది” అని ఆయన పేర్కొన్నారు.
