బాలీవుడ్ వర్సెస్ టాలీవుడ్: 10 ఏళ్ల బాక్సాఫీస్ యుద్ధంలో పైచేయి ఎవరిది?

గత దశాబ్దంలో ఇండియన్ బాక్సాఫీస్ ఒక స్పష్టమైన సంకేతం ఇచ్చింది. స్టార్ పవర్ మాత్రమే కాదు, స్కేల్ ఉన్న కథలు, రిపీట్ విలువ ఉన్న ఎమోషన్, దేశాన్ని దాటి పనిచేసే యూనివర్సల్ అప్పీల్ ఉన్న సినిమాలే అసలైన విజేతలుగా నిలుస్తున్నాయి. చిన్న బజ్‌తో మొదలైన సినిమాలు కూడా సరైన కంటెంట్ ఉంటే రికార్డులు బ్రేక్ చేయగలవని ఈ పదేళ్ల ప్రయాణం స్పష్టం చేసింది. ముఖ్యంగా పీరియాడిక్ డ్రామాలు, మాస్ ఎమోషన్‌తో కూడిన యాక్షన్ ఎపిక్స్, దేశభక్తి టోన్ ఉన్న కథలు, పాన్ ఇండియా ప్రెజెంటేషన్ ఉన్న సినిమాలే బాక్సాఫీస్‌కు ఎక్కువగా నచ్చాయి.

ఈ ట్రెండ్‌కు తాజా ఉదాహరణగా నిలిచింది రణవీర్ సింగ్ నటించిన ధురంధర్. పెద్ద అంచనాలు లేకుండా రిలీజైన ఈ సినిమా, మాటా మాటా పెరిగిన వర్డ్ ఆఫ్ మౌత్‌తో 2025లో ఇండియన్ సినీ చరిత్రలోనే టాప్ గ్రాసర్‌గా నిలిచింది. రిషబ్ శెట్టి కాంతార చాప్టర్ వన్ కలెక్షన్స్‌ను దాటేసి, ఎవ్వరూ ఊహించని స్థాయికి చేరుకోవడం ట్రేడ్ వర్గాలను కూడా ఆశ్చర్యానికి గురి చేసింది.

సంవత్సరాల వారీగా ప్రపంచవ్యాప్తంగా అత్యధిక వసూళ్లు సాధించిన భారతీయ సినిమాలు

2016 – దంగల్ (బాలీవుడ్)
2017 – బాహుబలి 2 (టాలీవుడ్)
2018 – 2.0 (కోలీవుడ్)
2019 – వార్ (బాలీవుడ్)
2020 – తానాజీ (బాలీవుడ్)
2021 – పుష్ప: ది రైజ్ (టాలీవుడ్)
2022 – ఆర్‌ఆర్‌ఆర్‌ (టాలీవుడ్)
2023 – జవాన్ (బాలీవుడ్)
2024 – పుష్ప 2: ది రూల్ (టాలీవుడ్)
2025 – ధురంధర్ (బాలీవుడ్)

ఇండస్ట్రీ వారీగా లెక్క (2016–2025)

బాలీవుడ్ (హిందీ): 5 సినిమాలు – దంగల్, వార్, తానాజీ, జవాన్, ధురంధర్
టాలీవుడ్ (తెలుగు): 4 సినిమాలు – బాహుబలి 2, పుష్ప: ది రైజ్, ఆర్‌ఆర్‌ఆర్‌, పుష్ప 2: ది రూల్
కోలీవుడ్ (తమిళం): 1 సినిమా – 2.0

2016 నుంచి చూస్తే ఈ ప్రయాణం దంగల్‌తో మొదలైంది. క్రీడా నేపథ్యంతో, తండ్రి–కూతుళ్ల భావోద్వేగాన్ని గ్లోబల్ లెవెల్‌లో కనెక్ట్ చేసిన ఈ సినిమా బాలీవుడ్‌కు కొత్త మార్కెట్లను తెరిచింది. ఆ తర్వాత 2017లో బాహుబలి 2 వచ్చి, ఇండియన్ సినిమా పరిమితులను పూర్తిగా చెరిపేసింది. ఒక తెలుగు సినిమా ప్రపంచవ్యాప్తంగా చరిత్ర సృష్టించగలదని నిరూపించిన మైలురాయి అది.

2018లో టెక్నాలజీ, స్టార్ పవర్ కలిసొచ్చిన 2.0 కోలీవుడ్‌కు గ్లోబల్ గుర్తింపునిచ్చింది. 2019లో వార్ మోడర్న్ యాక్షన్, గ్లామర్, దేశభక్తి మిక్స్‌తో బాలీవుడ్‌ను మళ్లీ టాప్‌లో నిలబెట్టింది. 2020లో తానాజీ లాంటి హిస్టారికల్ డ్రామా, కోవిడ్ ప్రభావం ఉన్నా కూడా ప్రేక్షకులను థియేటర్లకు లాగగలిగింది.

2021లో పుష్ప ది రైజ్ ఒక్కసారిగా మాస్ కల్చర్‌ను షేక్ చేసింది. లోకల్ కథ కూడా నేషనల్ ఫీవర్‌గా మారవచ్చని ఇది చూపించింది. 2022లో ఆర్ఆర్ఆర్ వచ్చి, ఇండియన్ సినిమాకు ఇంటర్నేషనల్ రెస్పెక్ట్ తీసుకొచ్చింది. యాక్షన్, ఎమోషన్, బ్రదర్‌హుడ్ అన్నీ కలిసి పనిచేసిన అరుదైన విజయం అది.

2023లో జవాన్, స్టార్ ఇమేజ్‌ను సోషల్ మెసేజ్‌తో మిక్స్ చేసి బాలీవుడ్‌కు భారీ కమ్‌బ్యాక్ ఇచ్చింది. 2024లో పుష్ప 2, సీక్వెల్స్‌కు ఉన్న మార్కెట్ పవర్‌ని మరోసారి రుజువు చేసింది. అప్పటికే బ్రాండ్‌గా మారిన క్యారెక్టర్, భారీ ఓపెనింగ్స్‌కు కారణమైంది.

ఇక 2025లో ధురంధర్ చేసిన ఎంట్రీ ఈ లిస్టుకు కొత్త ట్విస్ట్ ఇచ్చింది. పెద్ద ఫ్రాంచైజీ కాదు, పాన్ ఇండియా హైప్ కూడా లేదు. కానీ స్ట్రాంగ్ నేరేషన్, రఫ్ యాక్షన్, ఎమోషనల్ ఇంటెన్సిటీ కలిసి బాక్సాఫీస్‌ను ఊపేశాయి. ఇదే ఈ దశాబ్దం ఇచ్చిన అతిపెద్ద పాఠం.

ఈ పదేళ్ల లెక్కలు చూస్తే బాలీవుడ్ ఐదు సార్లు టాప్‌లో నిలిచింది. తెలుగు సినిమా నాలుగు సార్లు, తమిళం ఒకసారి ఈ గౌరవాన్ని దక్కించుకున్నాయి. భాష ఏదైనా సరే, ప్రేక్షకులు చివరకు వెతుక్కునేది మాత్రం కథలోని బలం, ఎమోషన్‌లోని నిజాయితీనే.

ఆమిర్ ఖాన్ నుంచి షారుక్ ఖాన్ వరకూ, ప్రభాస్ నుంచి అల్లు అర్జున్ వరకూ, ఎన్టీఆర్, రామ్ చరణ్, రజనీకాంత్ లాంటి స్టార్లు ఈ ప్రయాణంలో కీలకంగా నిలిచారు. ఇప్పుడు ఆ జాబితాలో రణవీర్ సింగ్ పేరు కూడా చేరింది. ఇది కేవలం ఒక సినిమా విజయం కాదు. ఇండియన్ బాక్సాఫీస్ ఎలాంటి కథలను అక్కున చేర్చుకుంటుందో చెప్పే స్పష్టమైన సంకేతం.