గ్లామర్ ఇండస్ట్రీలో హీరోయిన్ల పరిస్థితి ఒక్కోసారి వర్ణనాతీతంగా మారిపోతోంది. వెండితెరపై అందాల విందు చేసే ఈ భామలకు, బయట పబ్లిక్ ఈవెంట్లలో చుక్కలు కనిపిస్తున్నాయి. కెమెరా పట్టుకున్న ప్రతివాడూ ఫొటోగ్రాఫర్ అనుకుంటే పొరపాటే, కొందరు మాత్రం హీరోయిన్ల శరీర భాగాలను జూమ్ చేసి అసభ్యకరంగా చిత్రీకరించడమే పనిగా పెట్టుకున్నారు. ఈ నీచమైన ట్రెండ్పై ఇప్పుడు సౌత్ ఇండియాలో ఒక పెద్ద యుద్ధమే మొదలైంది. తాజాగా ముగ్గురు స్టార్ హీరోయిన్లు ఏకమై చేసిన పోస్ట్ ఇప్పుడు ఇంటర్నెట్ను షేక్ చేస్తోంది.
అక్కడ జూమ్ చేయాల్సిన అవసరం ఏముంది?
కన్నడ సెన్సేషన్లు సప్తమి గౌడ, ఆషిక రంగనాథ్, రుక్మిణి వసంత్ ఒకేసారి సోషల్ మీడియా వేదికగా విరుచుకుపడ్డారు. పబ్లిక్ ఈవెంట్లకు హాజరైనప్పుడు కొందరు వ్యక్తులు అభ్యంతరకర యాంగిల్స్లో ఫొటోలు, వీడియోలు తీసి వాటిని సోషల్ మీడియాలో వైరల్ చేస్తున్నారని మండిపడ్డారు. ముఖ్యంగా నటనను గుర్తించాల్సిన చోట, శరీర భాగాలను జూమ్ చేసి అసభ్యకరంగా పోస్టులు పెట్టడం ఎంతవరకు సమంజసం అని ప్రశ్నించారు. ఇది కేవలం ఫొటో తీయడం కాదు, ఒక మహిళ గౌరవానికి భంగం కలిగించడమే అని గట్టిగా వాయిస్ వినిపించారు.
వృత్తి ధర్మం మర్చిపోయారా? పద్ధతి మార్చుకోకుంటే అంతే!
“మేము ఇక్కడ సినిమా కోసం, మా వృత్తి కోసం ఉన్నాం. అంతేకానీ మీ జూమ్ లెన్స్లకు మేతగా కాదు” అంటూ ఈ భామలు ఘాటుగా స్పందించారు. కనీస మర్యాద, సభ్యత లేకుండా ప్రవర్తించే వారిపై కఠినంగా ఉండాల్సిన సమయం వచ్చిందని పిలుపునిచ్చారు. గతంలో కూడా ఆషిక రంగనాథ్ ఇలాంటి వేధింపులపై అసహనం వ్యక్తం చేశారు, కానీ పరిస్థితి మారకపోవడంతో ఇప్పుడు హీరోయిన్లంతా ఒకే తాటిపైకి వచ్చి తమ నిరసన వ్యక్తం చేస్తున్నారు. ఈ ఉద్యమం ఇప్పుడు టాలీవుడ్లో కూడా హాట్ టాపిక్గా మారింది.
స్టార్ హీరోయిన్లు ఇలా బాహాటంగా అసభ్యకర ఫొటోగ్రఫీపై గొంతు విప్పడం ఇప్పుడు సంచలనంగా మారింది. టెక్నాలజీని వాడుకుని ఆడవారి ప్రైవసీని దెబ్బతీసే ఇలాంటి నీచమైన పనులకు ఇకనైనా ఫుల్ స్టాప్ పడుతుందా? లేక ఈ జూమ్ కల్చర్ ఇలాగే కొనసాగుతుందా? అన్నది చూడాలి. ఏది ఏమైనా, ఈ ముగ్గురు ముద్దుగుమ్మలు చేసిన పోస్ట్ మాత్రం ఇప్పుడు సోషల్ మీడియాలో మంటలు పుట్టిస్తోంది!