టాలీవుడ్ క్రియేటివ్ డైరెక్టర్ కృష్ణవంశీ గురించి ప్రత్యేకంగా పరిచయం అక్కర్లేదు. ఆయన కెరీర్లో మైలురాయిగా నిలిచిన సినిమా ‘మురారి’. మహేష్ బాబును సాఫ్ట్ ఇమేజ్ నుంచి అసలైన నటుడిగా మార్చిన ఈ క్లాసిక్ వెనుక ఎవరికీ తెలియని ఒక పెద్ద డ్రామా జరిగింది. ఈ సినిమా షూటింగ్ సమయంలో కృష్ణవంశీని డైరెక్టర్గా మార్చేయాలని స్వయంగా సూపర్ స్టార్ కృష్ణ అనుకున్నారట! అసలు అంత పెద్ద నిర్ణయం తీసుకోవడానికి కారణం ఏంటి?
నిర్మాతతో విభేదాలు.. సెట్ లో టెన్షన్!
సినిమా ప్రారంభంలోనే కృష్ణవంశీకి, నిర్మాత రామలింగేశ్వరరావుకి మధ్య కొన్ని క్రియేటివ్ డిఫరెన్సెస్ వచ్చాయట. గొడవ పెద్దదవ్వడంతో, నిర్మాత సెట్కి రావడం కూడా మానేసి తన బావమరిదిని షూటింగ్ పనులు చూసుకోమని పంపారట. అయితే అసలు ట్విస్ట్ సినిమా చివర్లో వచ్చింది.
ఆ ఒక్క పాట.. కృష్ణ గారి సీరియస్ వార్నింగ్!
సినిమా క్లైమాక్స్లో వచ్చే ‘పెళ్లి పాట’ (అలన్ నాటి) విషయంలో పెద్ద రచ్చ జరిగింది. అప్పటివరకు వరుస ఫ్లాపుల్లో ఉన్న మహేష్ బాబుకు ఈ సినిమా హిట్ అవ్వడం చాలా ముఖ్యం. అందుకే, చివరిలో క్లాసిక్ పెళ్లి పాట కంటే ఒక మాస్ మసాలా సాంగ్ పెడితే థియేటర్లు ఊగిపోతాయని, సినిమా రేంజ్ మారుతుందని కృష్ణ గారికి కొందరు సలహా ఇచ్చారట.
ఈ విషయం చర్చకు వచ్చినప్పుడు కృష్ణవంశీ మొండిగా వ్యవహరించారు. మాస్ సాంగ్ పెడితే కేవలం ఆ సమయానికి మాత్రమే ఆడుతుందని, కానీ ఈ పెళ్లి పాట కొన్ని దశాబ్దాల పాటు నిలిచిపోతుందని కృష్ణవంశీ వాదించారు.
“నన్ను తీసేయండి.. నా పేరు కూడా వేసుకోను!”
ఈ చర్చ కాస్త సీరియస్గా మారడంతో కృష్ణవంశీ ఆవేదనతో ఒక షాకింగ్ నిర్ణయం తీసుకున్నారు. “మహేష్ కెరీర్ కోసం మాస్ సాంగే కావాలని మీరు అనుకుంటే.. నా ప్లేస్లో వేరే డైరెక్టర్ని పెట్టుకుని ఆ సాంగ్ షూట్ చేసుకోండి. నేను సినిమా నుంచి తప్పుకుంటాను, కనీసం డైరెక్టర్గా నా పేరు కూడా వేసుకోను” అని కృష్ణ గారి మొహం మీదే చెప్పేశారట.
కృష్ణవంశీ డెడికేషన్ చూసి షాక్ అయిన కృష్ణ గారు.. “సరే, నిన్ను మార్చడం కరెక్ట్ కాదు, నీ నమ్మకమే గెలవాలి.. నువ్వు అనుకున్నట్టే చెయ్” అని సపోర్ట్ ఇచ్చారు.
కాలమే సమాధానం చెప్పింది!
చివరికి కృష్ణవంశీ చెప్పిందే నిజమైంది. ‘మురారి’ సినిమా విడుదలై ఇండస్ట్రీని ఊపేసింది. ఆ పెళ్లి పాట ఇప్పటికీ తెలుగు ఇళ్లలో పెళ్లిళ్లంటే వినిపించే మొట్టమొదటి సాంగ్గా నిలిచిపోయింది. విమర్శకుల ప్రశంసలతో పాటు మహేష్ బాబు కెరీర్ను ఈ సినిమా మలుపు తిప్పింది.
