షూటింగ్ పూర్తి చేసుకుని, విజువల్ ఎఫెక్ట్స్ పని ముగించుకుని, గుమ్మడికాయ కొట్టేసినా కూడా థియేటర్ల వరకు రాలేకపోతున్నాయి ఈ బిగ్ బడ్జెట్ సినిమాలు. కారణం.. వినడానికి వింతగా ఉన్నా ఇదే నిజం. డిజిటల్ రైట్స్ క్లోజ్ అవ్వకుండా థియేట్రికల్ డేట్ ఇచ్చే ప్రసక్తే లేదని నిర్మాతలు మొండికేస్తున్నారు. మునుపెన్నడూ లేని విధంగా ఓటీటీ సంస్థలు ఇప్పుడు బేరసారాలకు దిగడంతో మెగాస్టార్, ప్రభాస్ సినిమాలకు ఊహించని అడ్డంకులు ఎదురవుతున్నాయి.
మెగాస్టార్ ‘విశ్వంభర’కు తప్పని తిప్పలు!
చిరంజీవి కెరీర్లోనే అత్యంత ప్రతిష్టాత్మకమైన సోషియో ఫాంటసీ మూవీ ‘విశ్వంభర’ షూటింగ్ ఎప్పుడో పూర్తయింది. గ్రాఫిక్స్ కూడా రెడీ. కానీ, రిలీజ్ డేట్ ప్రకటన మాత్రం రావడం లేదు. అంతా సెట్ అనుకున్న టైంలో ఓటీటీ డీల్ దగ్గర బండి ఆగింది. డిజిటల్ రైట్స్ కోసం జరుగుతున్న చర్చలు ఇంకా ఒక కొలిక్కి రాలేదు. భారీ రేటు ఆశిస్తున్న నిర్మాతలకు, ఓటీటీ సంస్థలకు మధ్య ఇంకా లెక్కలు తేలలేదని ఇండస్ట్రీ టాక్. ఈ డీల్ ఓకే అయితేనే మెగా ఫ్యాన్స్కు రిలీజ్ డేట్ ముహూర్తం తెలిసేలా ఉంది.
ప్రభాస్ మార్కెట్కు పాత ఫ్లాపుల సెగ!
రెబల్ స్టార్ ప్రభాస్ రేంజ్ ఏంటో అందరికీ తెలుసు, కానీ రీసెంట్ సెగలు మాత్రం ఆయన కొత్త సినిమా ‘ఫౌజీ’ని వదలడం లేదు. మైత్రీ మూవీ మేకర్స్ నిర్మిస్తున్న ఈ భారీ చిత్రం దసరాకు వస్తుందని ఊహించినా, ఇప్పుడు ఆ ఆశలు సన్నగిల్లుతున్నాయి. ప్రభాస్ గత చిత్రాల రిజల్ట్స్ చూసిన ఓటీటీ సంస్థలు, ఇప్పుడు ‘ఫౌజీ’ డీల్ విషయంలో వెనకడుగు వేస్తున్నాయట. అందుకే చర్చలు ఇంకా ప్రాథమిక దశలోనే ఉండిపోయాయి. ట్రేడ్ వర్గాల సమాచారం ప్రకారం.. డిజిటల్ బిజినెస్ క్లోజ్ కాకపోవడం వల్లనే రిలీజ్ ప్లాన్ మారుతోందని తెలుస్తోంది.
మొత్తానికి, బాక్సాఫీస్ వద్ద రికార్డులు తిరగరాయాల్సిన ఈ భారీ సినిమాలు, ఇప్పుడు ఓటీటీ సంస్థల దయాదాక్షిణ్యాల కోసం వేచి చూడాల్సిన పరిస్థితి రావడం టాలీవుడ్లో హాట్ టాపిక్గా మారింది. ఈ అడ్డంకులు ఎప్పుడు తొలగుతాయో, థియేటర్లలో మెగా, రెబల్ స్టార్ల గర్జన ఎప్పుడు వినిపిస్తుందో చూడాలి.
