టబు అంటే ఇప్పటికి మనకు నిన్నే పెళ్లాడతా సినిమానే గుర్తు వస్తుంది. ఆ తర్వాత నాగ్ తో కలిసి నటించిన ఆవిడా మీ ఆవిడా గుర్తు వస్తాయి. అయితే ఆమె విభిన్న జానర్ చిత్రాలు హిందీలో చేసింది. అందులో హారర్ జానర్ కూడా మిక్స్ చేసి హిట్స్ కొట్టింది. అందుకేనేమో డైరక్టర్ ప్రియదర్శన్ ఆమెతో ఇప్పుడు ఓ హారర్ కామెడీ డ్రామాకు తెర తీస్తున్నారు.
ప్రియదర్శన్ – అక్షయ్ కుమార్ క్రేజీ కాంబినేష‌న్‌తో కలిసి ‘భూత్ బంగ్లా’ అనే చిత్రానికి టబు సంత‌కం చేసింది. ఇది హారర్ కామెడీ ఫ్రాంఛైజీ. ఇందులో ప్ర‌తి రెండు సంవ‌త్స‌రాల‌కు ఒక సినిమా చేయాల‌ని ప్రియదర్శన్ ప్లాన్ చేస్తున్న‌ట్టు తెలిసింది. ఇక ఈ ఫ్రాంఛైజీతో ఏక్తా క‌పూర్ లాంటి బోల్డ్ మ‌హిళా నిర్మాత చేర‌డం మ‌రింత ఆస‌క్తిని పెంచుతోంది.
అక్షయ్ – ప్రియదర్శన్ 13 సంవత్సరాల తర్వాత ఒక హార్రర్ కామెడీ కోసం తిరిగి క‌లుస్తుండ‌డం కూడా ఆస‌క్తిని క‌లిగిస్తోంది. ఈ కామెడీ చిత్రంలో పరేష్ రావల్, రాజ్‌పాల్ యాదవ్, అస్రానీ త‌దిత‌రులు న‌టిస్తున్నారు.
అక్షయ్ కుమార్ స‌ర‌స‌న వామికా గబ్బి న‌టించ‌నుంది. 2000లో హేరా ఫేరిలో చివరిగా కలిసి నటించిన తర్వాత టబు- అక్షయ్ కుమార్ ఇంత కాలానికి తిరిగి క‌లుస్తుండ‌టం అభిమానుల్లోను ఉత్సాహం పెంచుతోంది.
హారర్ కామెడీ స్క్రిప్టులో తన పాత్ర బాగా న‌చ్చ‌డంతో టబు ఈ చిత్రానికి ఓకే చెప్పారట. ప్రియదర్శన్ సృష్టించబోయే క్రేజీ ప్రపంచంలోకి అడుగు పెట్టడానికి టబు చాలా ఉత్సాహంగా వేచి చూస్తోందని స‌మాచారం. భూత్ బంగ్లా కాస్టింగ్ రోజురోజుకు పెద్దద‌వుతుంటే అది మ‌రింత ఉత్కంఠను పెంచుతోంది.
ఏప్రిల్ 2025 నాటికి పూర్తి చేసి 2026 ఏప్రిల్ లో సినిమాని రిలీజ్ చేయాల‌ని ప్లాన్ చేస్తున్నారు ఈ చిత్రం జానర్ కారణంగా భారీగా విజువల్ ఎఫెక్ట్స్ అవ‌స‌ర‌మ‌ని కూడా మేక‌ర్స్ చెబుతున్నారు.
