యశ్‌ హీరోగా చేస్తున్న ‘టాక్సిక్’ మూవీ వివాదంలో చిక్కుకుంది. భారీగా చెట్లను కొట్టేసి షూటింగ్ చేస్తున్నారంటూ అధికారులు షోకాజ్‌ నోటీసులు జారీ చేశారు. కర్ణాటక అటవీశాఖ మంత్రి ఈశ్వర్‌ బి.ఖాండ్రే ఈ విషయాన్ని ధ్రువీకరించారు.
‘కేజీయఫ్‌’ యశ్‌ (Yash) హీరోగా గీతూ మోహన్ దాస్‌ దర్శకత్వంలో రూపొందుతున్న చిత్రం ‘టాక్సిక్’ (Toxic Movie). ప్రస్తుతం షూటింగ్ దశలో ఉన్న ఈ మూవీ చిక్కుల్లో పడింది. పర్యావరణానికి హాని కలిగించేలా చెట్లను కొట్టేసి షూటింగ్ చేస్తున్నారని ఆరోపణలు వచ్చిన నేపథ్యంలో అధికారులు చిత్ర టీమ్ నికి షోకాజ్‌ నోటీసులు జారీ చేశారు.
గతేడాది అక్టోబర్‌ నుంచి బెంగళూరు సమీపంలోని పీన్య ప్రాంతంలో ‘టాక్సిక్’ షూటింగ్ జరుగుతోంది. షూటింగ్ కోసం అక్కడున్న వందల చెట్లను నరికేసి, భారీ సెట్స్‌ వేసినట్లు అటవీశాఖకు ఫిర్యాదులు వచ్చాయి.
ఈ క్రమంలో మంత్రి ఈశ్వర్‌ ఖండ్రే షూటింగ్ జరుగుతున్న ప్రాంతానికి వెళ్లి పరిస్థితిని రివ్యూ చేసారు. ఆ భూమికి సంబంధించిన వివరాలను కూడా అడిగి తెలుసుకున్నారు. అనంతరం అధికారులు చిత్ర నిర్మాతలకు నోటీసులు పంపారు.
‘టాక్సిక్’ షూటింగ్ జరుగుతున్న ప్రాంతాన్ని అధికారులు హిందుస్థాన్ మెషీన్ టూల్స్ (హెచ్‌ఎంటీ) సంస్థకు కట్టబెట్టారనే ఆరోపణలు ఉన్నాయి. దీనిపై ప్రస్తుతం కోర్టులో విచారణ జరుగుతోంది. హెచ్‌ఎంటీకి కేటాయించిన తర్వాత దాన్ని అటవీ ప్రాంతంగా గుర్తించాల్సిన అవసరం లేదనేది వాదన.
మంత్రిమండలి ఆమోదం లేకుండా డీ-నోటిఫికేషన్ చేయడాన్ని సవాల్‌ చేస్తూ ప్రభుత్వం కోర్టుకు వెళ్లింది. ప్రస్తుతం దీనిపై విచారణ జరుగుతోంది.
ఈ క్రమంలోనే హెచ్‌ఎంటీ నుంచి కెనరా బ్యాంకు సదరు ప్రాంతాన్ని కొనుగోలు చేసి ‘టాక్సిక్’ చిత్ర టీమ్ కి లీజుకు ఇచ్చింది. దీనిపైనా ప్రస్తుతం స్కూటీనీ చేస్తున్నారు. ఆ స్థలం చుట్టూ వివాదాలు చుట్టుముట్టడంతో షూటింగ్ ఆపాలంటూ అధికారులు నోటీసులు ఇచ్చారు.
