సినిమా వార్తలుసోషల్ మీడియా
AI వైపరిత్యం షాక్: శ్రీలీలను కలిచివేసిన ఫేక్ కంటెంట్!
ఏఐ… భవిష్యత్తు కోసం పుట్టిన టెక్నాలజీ. కానీ అదే టెక్నాలజీ ఇప్పుడు సెలబ్రిటీల గౌరవంపై దాడి చేసే ఆయుధంగా మారితే? తాజాగా ఈ డిజిటల్ వైపరిత్యానికి బలైనది శ్రీలీల. స్క్రీన్పై చిరునవ్వులతో కనిపించే ఆమె, సోషల్ మీడియాలో మాత్రం తీవ్రమైన ఆవేదన వ్యక్తం చేసింది.
ఇటీవల సోషల్ మీడియాలో ఏఐ టెక్నాలజీని అశ్లీలతకు, అవమానానికి వాడుతున్న ఘటనలు పెరుగుతున్నాయి. ఫేక్ ఫోటోలు, మార్ఫ్ చేసిన వీడియోలు, నకిలీ కంటెంట్తో ముఖ్యంగా సెలబ్రిటీలను టార్గెట్ చేస్తున్నారు. ఈ క్రమంలోనే హీరోయిన్ శ్రీలీల కూడా ఏఐ ఫేక్ కంటెంట్ బారిన పడింది. దీంతో ఆమె తొలిసారి బహిరంగంగా స్పందిస్తూ ఒక ప్రెస్ నోట్ రిలీజ్ చేసింది.
— Sreeleela (@sreeleela14) December 17, 2025
“సోషల్మీడియా వినియోగిస్తున్న వారందరినీ చేతులు జోడించి అభ్యర్థిస్తున్నాను. ఏఐతో సృష్టించే చెత్త కంటెంట్కు మద్దతు ఇవ్వొద్దు. టెక్నాలజీని మంచి కోసం ఉపయోగించాలి,” అంటూ శ్రీలీల ఆవేదన వ్యక్తం చేసింది. తన బిజీ షెడ్యూల్స్ కారణంగా ఆన్లైన్లో ఏం జరుగుతుందో ఎప్పుడూ గమనించలేకపోతున్నానని, అయితే కొన్ని విషయాలను తన శ్రేయోభిలాషులు దృష్టికి తీసుకొచ్చారని చెప్పింది. సాధారణంగా ఇలాంటి వాటిని పట్టించుకోనప్పటికీ, ఈసారి మాత్రం తనను తీవ్రంగా బాధించిందని స్పష్టం చేసింది.
ఇదే పరిస్థితిని తనతోటి నటీమణులు కూడా ఎదుర్కొంటున్నారని, ఇది వ్యక్తిగత సమస్య కాకుండా ఒక పెద్ద ప్రమాదకర ట్రెండ్గా మారుతోందని హెచ్చరించింది. ఈ విషయంలో అధికారులు తగిన చర్యలు తీసుకుంటారని ఆశిస్తున్నానని కూడా వెల్లడించింది.
నిజానికి ఇది ఒక్క శ్రీలీల ఎదుర్కొన్న సమస్య మాత్రమే కాదు. ఇది వ్యక్తిగత హక్కులు, గౌరవం, డిజిటల్ భద్రతకు సంబంధించిన సమాజపు బాధ్యత. ఏఐ, సోషల్ మీడియా మన జీవితాలను ముందుకు తీసుకెళ్లేందుకు ఉండాలి… మనుషులను కించపరచడానికి కాదు. అద్భుతాలు చేయగల టెక్నాలజీని చెత్త పనులకు వాడుతున్న ఈ ట్రెండ్ను ఇప్పుడే ఆపకపోతే, రేపు ఇది మరింత భయంకరంగా మారే ప్రమాదం ఉంది.
శ్రీలీల ఆవేదన ఒక హెచ్చరికగా తీసుకోవాల్సిన సమయం ఇదే. టెక్నాలజీ మన చేతుల్లో ఉంది… దాన్ని ఎలా వాడాలో మనమే నిర్ణయించాలి.
