టాలీవుడ్ సీనియర్ నటి రేణు దేశాయ్ మరోసారి వార్తల్లో నిలిచారు. గత కొంతకాలంగా సోషల్ మీడియా వేదికగా ఆమెను టార్గెట్ చేస్తూ వస్తున్న ట్రోలర్ల ఆట కట్టించడానికి ఆమె సిద్ధమయ్యారు. తనపై జరుగుతున్న వ్యక్తిగత దాడులు, అసభ్యకర వ్యాఖ్యలపై ఏకంగా సైబరాబాద్ సైబర్ క్రైమ్ డిసిపిని కలిసి అధికారికంగా ఫిర్యాదు చేశారు. ఈ పరిణామంతో ఇంటర్నెట్ లో ఇష్టమొచ్చినట్టు వాగే బ్యాచ్కు ఒక్కసారిగా మైండ్ బ్లాక్ అయ్యింది.
హద్దులు దాటిన వేధింపులు.. సాక్ష్యాలతో సహా రంగంలోకి!
చాలా కాలంగా తన ఇన్స్టాగ్రామ్ ఖాతాలో కొందరు నెటిజన్లు అసభ్యకరమైన భాష వాడుతున్నారని, వ్యక్తిత్వ హననానికి పాల్పడుతున్నారని రేణు దేశాయ్ ఆగ్రహం వ్యక్తం చేశారు. కేవలం ఫిర్యాదు చేయడమే కాకుండా, తనను తీవ్రంగా వేధిస్తున్న నాలుగు నిర్దిష్టమైన సోషల్ మీడియా అకౌంట్ల వివరాలను, అందుకు సంబంధించిన ఆధారాలను పోలీసులకు సమర్పించారు. చట్టపరమైన చర్యలు తీసుకోవాలని ఆమె కోరడంతో పోలీసులు విచారణను వేగవంతం చేశారు.
అకీరా, ఆద్యల రక్షణ కోసమేనా?
హైదరాబాద్లో తన పిల్లలు అకీరా నందన్, ఆద్యలతో కలిసి ఉంటున్న రేణు.. సినిమాల్లో సెకండ్ ఇన్నింగ్స్ మొదలుపెట్టారు. ప్రస్తుతం ఒక సినిమాలో అత్త పాత్రలో నటిస్తున్న ఆమె, తన రాజకీయ మరియు సామాజిక అభిప్రాయాలను నిర్మొహమాటంగా పంచుకుంటూ ఉంటారు. ఇదే ఆమెపై ట్రోలింగ్కు కారణమవుతోంది. అయితే ఈసారి వేధింపులు హద్దులు దాటడంతో, తన ఆత్మగౌరవం కోసం, పిల్లల భవిష్యత్తు కోసం ఆమె గట్టిగా నిలబడాలని నిర్ణయించుకున్నారు.
సెలబ్రిటీ కదా ఏమన్నా అనొచ్చు అనుకునే వారికి రేణు దేశాయ్ తీసుకున్న ఈ నిర్ణయం ఒక గట్టి గుణపాఠం. సోషల్ మీడియా ముసుగులో అసభ్యంగా ప్రవర్తించే వారిని పోలీసులు జైలుకు పంపుతారా? లేక ఆ అకౌంట్స్ శాశ్వతంగా డిలీట్ అవుతాయా? అన్నది ఇప్పుడు ఆసక్తికరంగా మారింది. మరి రేణు దేశాయ్ చేసిన ఈ సాహసోపేతమైన ఫిర్యాదుపై మీ అభిప్రాయం ఏంటి? కామెంట్స్ లో తెలియజేయండి!