ఒకప్పుడు విజయ్ దేవరకొండ స్పీచ్ అంటే ఉర్రూతలూగించే డైలాగులు, స్టేజ్‌పై రెచ్చిపోయే హెచ్చరికలు. ‘వాట్ ల‌గాదేంగే..’ లాంటి డైలాగులు … ఇవన్నీ అతని స్టైల్. అదే స్టైలే ఆయనకు ఫ్యాన్ బేస్‌ను తక్కువ సమయంలో తెచ్చిపెట్టింది. కానీ అదే దూకుడు కొన్ని సందర్భాల్లో సమస్యలకూ దారి తీసింది. సినిమా హిట్ అయితే ఆ మాటలన్నీ జనానికి కిక్కిస్తాయి. కానీ ఫ్లాప్ వస్తే? అవే మాటలు ట్రోలింగ్‌గా మారతాయి, శూలాల్లా గుచ్చుకుంటాయి.
విజయ్‌కు ఇది కొత్త అనుభవం కాదు. గతంలో కూడా ఇదే జరిగిందంటూ టెంప్లేట్‌లా రిపీట్ అయ్యింది. సినిమా రిలీజుకు ముందు బోల్డ్ స్టేట్‌మెంట్లు… తర్వాత ఫలితం తేడా కొచ్చి, అవే ఆయనను మునిగేలా చేసాయి. ప్రచారానికి మించి, డ్యామేజ్ ఎక్కువైపోయిన సందర్భాలూ ఉన్నాయి.
కానీ ఇప్పుడు పరిస్థితి వేరైంది.
‘కింగ్‌డమ్’ ట్రైలర్ లాంచ్ ఈవెంట్‌లో విజయ్ స్పీచ్ విన్నవాళ్లకి ఒక విషయం స్పష్టంగా అనిపించింది – ఈసారి విజయ్ తన దూకుడుకి బ్రేక్ వేశాడు. రెగ్యులర్ మాస్ పంచ్‌లేవు. రెచ్చిపోయే ధ్వజాల్లేవు. బదులుగా… “సినిమా ఫలితం itself will speak” అనే భావం కనిపించింది. నిజంగా, ఈ మార్పు ఏమీ యాదృచ్ఛికం కాదు.
వాస్తవానికి దీనికి ప్రధాన కారణం నిర్మాత నాగవంశీ అని టాక్. “ఈసారి ప్రమోషన్స్‌లో నువ్వు కామ్‌గా ఉండు. అవసరం లేని స్టేట్‌మెంట్లు, ఇంటర్వ్యూలు వద్దు” అని విజయ్‌కు ముందే గట్టి క్లారిటీ ఇచ్చాడు. విజయ్ కూడా ఆ మాట వినడం విశేషమే. ఎందుకంటే ఇప్పటి విజయ్‌కు ప్రతి మాటకు విలువ తెలుసు. ఒక్క తప్పు మాట సినిమాని తలకిందులవేసే ప్రమాదం ఉందని అర్థమైంది. ఫలితంగా — ‘కింగ్‌డమ్’ ప్రచారంలో విజయ్ పూర్తిగా కంట్రోల్‌లో ఉన్నట్టు స్పష్టమవుతోంది.
ఇప్పటివరకు ఇచ్చిన స్పీచ్‌లు, సందీప్ రెడ్డి వంగా‌తో చేసిన చిట్‌చాట్ – అన్నింటిలోనూ విజయ్ measured, balanced గా ఉన్నాడు. ఇది కొత్త విజయ్ దేవరకొండ. మేచ్యూర్డ్, సైలెన్స్‌కి విలువ తెలిసిన స్టార్.
విజయ్ బండి ఇప్పుడు నిదానంగా తిరిగింది. కానీ తిరిగి గట్టిగా స్పీడెక్కాలంటే ఓ హిట్ తప్పనిసరి. దానికోసం ఈ సారి ఎలాంటి రిస్క్ తీసుకోకుండా ముందుకెళ్తున్నాడు. ఆయన డైలాగ్‌లు కాదు, సినిమా మాట్లాడాలని భావిస్తున్నాడు.
ఇప్పుడు ఒక్క సందేహం: ప్రీ-రిలీజ్ ఈవెంట్‌లోనైనా విజయ్ హల్చల్ చేస్తాడా? లేక అదే సైలెన్స్ కంటిన్యూ అవుతుందా?
ఏమైనా నాగవంశీ ప్లాన్ మంచి పని చేసినట్టే… విజయం వస్తే — ఈ కొత్త విజయ్ ఫామ్ ఎప్పుడూ కొనసాగుతాడేమో చూడాలి!
