iBomma రవి అసలు గేమ్ బయటపడింది! ఆ క్రైమ్ మనీ ఏం చేసాడో తెలుసా?

పైరసీ వెబ్‌సైట్లు iBomma, Bappamలను నడిపిన ఇమ్మడి రవిపై జరుగుతున్న విచారణలో పోలీసులు కీలక విషయాలను వెలికితీశారు. అక్రమ మార్గాల్లో సంపాదించిన డబ్బును రవి హైదరాబాద్, ఆంధ్రప్రదేశ్‌లోని తన సన్నిహిత మిత్రుల ఖాతాల్లోకి ట్రాన్స్‌ఫర్ చేసినట్లు ప్రాథమిక దర్యాప్తులో బయటపడింది.

ప్రస్తుతం రవి ఐదు రోజుల పోలీసు కస్టడీలో ఉండగా, అతడి ఆస్తులు, లావాదేవీలు, విదేశీ లింకులపై విచారణ సాగుతోంది. విచారణలో రవి తన అక్రమ ఆదాయంతో విదేశీ ప్రయాణాలు, రియల్ ఎస్టేట్ కొనుగోలులు చేసినట్లు ఒప్పుకున్నట్టు సమాచారం. అంతేకాకుండా అతడి పేరుతో ఓవర్సీస్ బ్యాంక్ ఖాతాల్లో పెద్ద మొత్తాలు ఉన్నట్లు కూడా పోలీసులు గుర్తించారు.

విచారణలో కీలక అంశం సర్వర్ వివరాలు. iBomma, Bappam నిర్వహణకు ఉపయోగించిన సర్వర్ల IP అడ్రెస్లు, హోస్టింగ్ వివరాలను పోలీసులు ఇప్పటికే టెక్నికల్ టీమ్ ద్వారా విశ్లేషించారు. అయితే రవి మాత్రం విచారణలో “సర్వర్ వివరాలు గుర్తులేవు” అంటూ తప్పించుకోవడం గమనార్హం.

అతను విదేశాల నుండి తిరిగి వచ్చినరోజే పోలీసులు ఇంటికి వెళ్లినప్పుడు, తలుపు తెరవడానికి గడిపిన సమయంలో డిజిటల్ ఎవిడెన్స్ తొలగించే ప్రయత్నం జరిగి ఉండొచ్చని అధికారులు అనుమానిస్తున్నారు. ల్యాప్‌టాప్‌ను washroom‌లో దాచిన స్థితిలో పోలీసులు స్వాధీనం చేసుకున్నారు. ప్రస్తుతం నిపుణుల బృందం ఎరేజ్ చేసిన డేటా రికవరీ పై పని చేస్తోంది.

విచారణలో రవి వ్యక్తిగత విషయాలే చెప్పి, వ్యాపార కార్యకలాపాలపై వివరాలను ఇవ్వకుండా తప్పించుకుంటున్నాడు. ఇదే సమయంలో అతని స్నేహితుల లావాదేవీలు, వారి ఖాతాల్లోకి వెళ్లిన డబ్బు పై స్పెషల్ టీమ్ దృష్టి పెట్టింది.

పోలీసుల ప్రాధాన్య లక్ష్యం—

✔ అక్రమ డబ్బు ప్రవాహం ఎక్కడి నుంచి ప్రారంభమై, ఎవరెవరికి చేరిందో పూర్తి డేటా ను గుర్తించడం
✔ సర్వర్ లొకేషన్లు, టెక్నికల్ ఆపరేషన్స్ అసలు హ్యాండిల్ చేసినవారు ఎవరో బయటపెట్టడం

దర్యాప్తు వేగవంతం కావడంతో, iBomma కేసులో మరిన్ని కీలక పేర్లు బయటకు వచ్చే అవకాశం ఉన్నదని పోలీసు వర్గాలు సూచిస్తున్నాయి.