హైదరాబాద్: తన కథలలో ఓ ప్రత్యేకత ఉండే శేఖర్ కమ్ముల తాజాగా వచ్చిన “కుబేరా” సినిమా తో పాన్ ఇండియా ప్రయోగం చేసినా, ఫలితం ఆశించిన విధంగా రాలేదు. తెలుగులో ఓ మోస్తరుగా ఆడినా, ఇతర భాషల్లో — ముఖ్యంగా తమిళంలో — పెద్దగా నిలవలేకపోయింది. బాక్సాఫీస్ వద్ద ఈ మూవీకి “డీసెంట్” అనిపించుకునే రేంజ్ ఫలితమే దక్కింది కానీ, బ్లాక్‌బస్టర్ మాటదాకా వెళ్లలేదు.
ఈ ఫలితాల నేపథ్యంలో, శేఖర్ ఇప్పుడు తన తదుపరి ప్రాజెక్టును మరింత జాగ్రత్తగా ప్లాన్ చేస్తున్నట్లు ఫిలింనగర్ టాక్. పాన్‌ఇండియా మార్కెట్ కోసం శైలిని మార్చుకోవాలనే ఆలోచన కాకుండా, ఆయన తిరిగి తన ఒరిజినల్ గమ్యాన్ని వెతుక్కుంటున్నారు — అంటే, సరళమైన కథలు, సున్నితమైన భావోద్వేగాలు, మనసు దోచే సంగీతం అనే త్రయం.
“హ్యాపీ డేస్”, “లీడర్”, “ఫిదా”… ఇలా ఎన్నో హిట్ సినిమాల్లో పాటలు ఒక స్ట్రాంగ్ హైలైట్‌గా నిలిచిన విషయం తెలిసిందే. కాబట్టే, తాజా సమాచారం ప్రకారం, ఆయన ఇప్పుడు మళ్లీ అలాంటి పాటలకే స్పేస్ ఇచ్చే కథ మీదే పనిచేస్తున్నారట.
అదే సమయంలో, హీరో నానితో ఓ ప్రాజెక్ట్ కోసం చర్చలు మొదలయ్యాయని సమాచారం. అయితే ఈ సినిమా త్వరలో స్టార్ట్ అయ్యేలా లేనట్లు కనిపిస్తోంది. ఎందుకంటే కమ్ముల సాధారణంగా కథ, స్క్రిప్ట్ కోసం ఏడాది వరకు టైం తీసుకుంటారు. నాని కూడా ప్రస్తుతం “ది ప్యారడైస్” షూటింగ్‌లో బిజీగా ఉన్నారు. సో ఇద్దరికీ టైమింగ్ కూడా కుదిరేలా ఉందనుకోవచ్చు.
ఇక శేఖర్ కమ్ముల ఈసారి మళ్లీ తన “జానర్” స్టోరీలతో, మనల్ని ఎమోషనల్ జర్నీలోకి తీసుకుపోతారా? లేక కొత్త మలుపు తీసుకుంటారా? తెలియాల్సి ఉంది కానీ, ఆయన రీ-సెటప్ పై మాత్రం ఇండస్ట్రీలో చర్చ మోగుతోంది!
