తెర వెనుక దాక్కుని దాడులు… ఇది ఆగాల్సిందేనంటున్న సోనాక్షి

బాలీవుడ్ హీరోయిన్ సోనాక్షి సిన్హా గురించి పరిచయం అక్కర్లేదు. నటిగా మాత్రమే కాకుండా, తన అభిప్రాయాలను స్పష్టంగా చెప్పే సెలబ్రిటీగా ఆమెకు ప్రత్యేక గుర్తింపు ఉంది. తాజాగా ఆమె చేసిన వ్యాఖ్యలు ఇప్పుడు సోషల్ మీడియాలో విస్తృతంగా చర్చకు దారి తీస్తున్నాయి. ఆన్‌లైన్ వేధింపులు రోజురోజుకూ తీవ్రమవుతున్న నేపథ్యంలో, దీనిపై సోనాక్షి గట్టిగా స్పందించారు.

ముంబైలో జరిగిన ఓ కార్యక్రమంలో మాట్లాడిన సోనాక్షి సిన్హా, సోషల్ మీడియా వేదికగా జరుగుతున్న దూషణలు, వ్యక్తిగత దాడులపై తీవ్ర ఆందోళన వ్యక్తం చేశారు. ఇది ఇప్పుడు కేవలం నటులకే పరిమితం కాకుండా, సినిమా విమర్శకుల వరకూ విస్తరించిందని ఆమె స్పష్టం చేశారు. తెర వెనుక దాక్కుని, స్క్రీన్ ముందు ఉన్నవారిపై ఎలాంటి బాధ్యత లేకుండా దాడులు చేయడం ప్రమాదకరమైన పరిస్థితిగా మారిందని ఆమె వ్యాఖ్యానించారు. ఎవరికైనా, ఎక్కడి నుంచైనా, ఏదైనా అనేయగలిగే స్వేచ్ఛ దుర్వినియోగంగా మారుతోందని ఆమె అభిప్రాయపడ్డారు.

ఈ డిజిటల్ దాడుల వెనుక ప్రధాన కారణం బాధ్యత లేకపోవడమేనని సోనాక్షి అన్నారు. ఇంటర్నెట్‌లో చేసే వ్యాఖ్యలకు ఎలాంటి పరిణామాలు ఉండవన్న భావనతోనే ట్రోల్స్ మరింత దూకుడుగా మారుతున్నారని ఆమె అభిప్రాయం. ఇది చాలా అన్యాయమని, మానసికంగా కూడా తీవ్ర నష్టం కలిగించే అంశమని ఆమె పేర్కొన్నారు. ఈ సమస్యను తేలికగా తీసుకోకూడదని, ఒక్క వ్యక్తి లేదా ఒక్క వర్గం పోరాటంతో ఇది పరిష్కారమయ్యే అంశం కాదని ఆమె స్పష్టం చేశారు.

సమాజం మొత్తంగా కలిసి ఆలోచించి, కఠినమైన చట్టాలు తీసుకురావాల్సిన అవసరం ఉందని సోనాక్షి సిన్హా పిలుపునిచ్చారు. కేవలం అవగాహన పెంచడం సరిపోదని, ఆన్‌లైన్ దూషణలపై నియంత్రణ ఉండాల్సిందేనని ఆమె అభిప్రాయపడ్డారు. ఈ విషయంలో ప్రభుత్వం, సోషల్ మీడియా సంస్థలు, సమాజం అంతా కలిసే పరిష్కారం వెతకాలని ఆమె వ్యాఖ్యలు ఇప్పుడు హాట్ టాపిక్‌గా మారాయి.