ఇప్పుడు ప్రపంచం మొత్తం ఆర్టిఫిషియల్ ఇంటెలిజెన్స్ చుట్టూ తిరుగుతోంది. రంగం ఏదైనా సరే — ఏఐ ప్రభావం గట్టిగానే కనిపిస్తోంది. సినిమా పరిశ్రమ కూడా ఈ మార్పుకు అపవాదేం కాదు. కథల రచన నుంచి ఎడిటింగ్ దాకా, స్క్రీన్‌ప్లే నుంచి విజువల్స్ వరకు ఏఐ వినియోగం భారీగా పెరుగుతోంది. ఇప్పుడు ఈ జాబితాలో సంగీతం కూడా చేరిపోయింది. భవిష్యత్తులో మ్యూజిక్ కంపోజింగ్ ఎలా మారబోతోందో, ఏఐ ఎలాంటి పాత్ర పోషించబోతోందో చెప్పే అద్భుత ఉదాహరణ ఒకటి బయటపడింది.
దక్షిణ భారతంలో టాప్ మ్యూజిక్ డైరెక్టర్లలో ఒకడైన అనిరుధ్ రవిచందర్ తాజాగా ఇచ్చిన ఇంటర్వ్యూలో ఓ ఆసక్తికర విషయం వెల్లడించాడు. ఓ పాట రాయేటప్పుడు చివరి రెండు లైన్ల దగ్గర తాను ఇరుక్కుపోయానని, కొత్త ఐడియా రావడం లేదని, దాంతో ChatGPT సహాయం తీసుకున్నానని అన్నాడు. “నాకు కావలసిన ఫీల్ ఇచ్చేలా కొన్ని సజెషన్లు అడిగాను. అప్పటివరకు రాసిన లిరిక్స్ ChatGPTకి ఇచ్చి, మిగిలిన రెండు లైన్లకు ఐడియా కోరితే చాలా ఇంట్రస్టింగ్ ఆప్షన్లు వచ్చాయి,” అంటూ వివరించాడు.
అయితే అనిరుధ్ ChatGPTను లిరిక్స్ కోసమా, ట్యూన్ కోసమా అడిగాడనేది స్పష్టంగా చెప్పలేదు. అయినా, ఈ విషయం వింటే చాలామందికి షాక్ తగులుతోంది. ఒక ప్రముఖ సంగీత దర్శకుడు ఏఐ సాయంతో పాటలపై పని చేస్తున్నాడంటే భవిష్యత్ సంగీత నిర్మాణం ఎలా ఉంటుందో ఊహించవచ్చు. కాస్త సంగీత జ్ఞానం ఉన్నవారెవరైనా ఇప్పుడు టెక్నాలజీ సహాయంతో తక్కువ టైంలోనే పాటలు సృష్టించగలిగే పరిస్థితి ఏర్పడుతోంది.
ఇది కేవలం ఒక స్టార్ట్ మాత్రమే. ఇలాంటి టూల్స్ మరింతగా అభివృద్ధి చెంది, సంగీతానికి కొత్త పరిమాణాలు తీసుకురానున్నాయన్నది స్పష్టమవుతోంది. కల్పితమైన లిరిక్స్, ఎమోషన్‌తో కూడిన ట్యూన్స్—all in a few clicks అన్నట్టుగా మారే రోజుల్ని చూస్తున్నాం.
వచ్చే తరంలో మ్యూజిక్ డైరెక్టర్ చేతిలో గిటార్ కాకుండా, మనస్సులో ట్యూన్ కాకుండా… ఒక ప్రాంప్ట్ ఉంటే చాలు అనిపించటం లేదా?
