తమిళంలో ఇటీవల ఒక కొత్త ట్రెండ్ మొదలైంది. అక్కడి సినిమాలకు పెట్టే టైటిల్స్ ఒక్క రాష్ట్రానికి కాకుండా, నేరుగా దేశవ్యాప్తంగా చర్చనీయాంశం అయ్యేలా, పాన్-ఇండియా లెవెల్‌లో ఉండేలా చూస్తున్నారు. పేరు విన్న వెంటనే సోషల్ మీడియాలో హడావుడి అయ్యేలా, క్యూరియాసిటీ పెంచేలా ఉండాలి అనేది వాళ్ల ఆలోచన. ఆ రూట్‌లోనే ఇప్పుడు తాజా తమిళ సినిమా “పూకీ” (Pookie) కూడా రంగంలోకి దిగింది.
ఇక అసలు విషయానికి వస్తే—ఇటీవల విజయ్ ఆంటోనీ హీరోగా నటించిన ఇన్వెస్టిగేషన్ థ్రిల్లర్ మార్గన్ మంచి విజయం సాధించింది. ఆ సినిమాలో ఆయన మేనల్లుడు అజయ్ దిశాన్ కీలక పాత్రలో కనిపించాడు. ఇప్పుడు అదే అజయ్ సోలో హీరోగా ఎంట్రీ ఇస్తూ కొత్త సినిమా చేస్తున్నాడు. ఈ సినిమాను విజయ్ ఆంటోనీ తన స్వంత బ్యానర్‌లో నిర్మిస్తున్నారు. గణేశ్ చంద్ర (సినిమాటోగ్రాఫర్‌గా పనిచేసిన అనుభవంతో) దర్శకుడిగా పరిచయం అవుతున్నారు. హీరోయిన్‌గా ధనూష నటిస్తోంది.
తాజాగా చెన్నైలో పూజా కార్యక్రమాలతో ఈ సినిమా షూటింగ్ మొదలైంది. విజయ్ ఆంటోనీ ముఖ్య అతిథిగా హాజరయ్యారు. “ది కోల్డెస్ట్ లవ్ హ్యాస్ హాటెస్ట్ ఎండ్” అనే ట్యాగ్ లైన్ తో సినిమా రూపొందుతోంది. నాలుగు–ఐదు నెలల్లో షూటింగ్ పూర్తి చేసి, 2026 వేసవిలో విడుదల చేయాలని మేకర్స్ భావిస్తున్నారు.
కానీ ఇక్కడే ట్విస్ట్ ఉంది. తమిళంలో “పూకీ” అనే పేరు సాధారణంగానే అనిపించినా, తెలుగులో మాత్రం ఈ టైటిల్ వినగానే చాలామందికి షాక్ తగిలింది. “ఇదేం పేరురా నాయనా! వీళ్లకు టైటిల్స్ దొరకలేదా?” అంటూ సోషల్ మీడియాలో విమర్శలు మొదలయ్యాయి. తెలుగు స్లాంగ్‌లో బూతుగా వినిపించేలా ఉందని నెటిజన్లు సెటైర్లు వేస్తున్నారు.
ఇప్పటికే తమిళ్ సినిమాల టైటిల్స్ పాన్-ఇండియా క్యూరియాసిటీ క్రియేట్ చేసే స్థాయికి వెళ్లిపోతే, ఈ “పూకీ” కూడా అలాంటి ట్రెండ్‌లో భాగమే. కానీ రిలీజ్ టైమ్‌కి తెలుగులో పేరులో ఏమైనా మార్పులు చేస్తారా లేదా అన్నది చూడాలి.
