ప్రముఖ సంగీత దర్శకుడు ఇళయరాజాకు సుప్రీంకోర్టులో నిరాశ ఎదురైంది. తాను స్వరపరిచిన 536కు పైగా పాటలకు సంబంధించిన కాపీరైట్ కేసును బాంబే హైకోర్టు నుంచి మద్రాస్ హైకోర్టుకు బదిలీ చేయాలని కోరుతూ ఆయన వేసిన పిటిషన్‌ను సుప్రీంకోర్టు తిరస్కరించింది.
ఈ పిటిషన్‌పై విచారణ చేపట్టిన ప్రధాన న్యాయమూర్తి జస్టిస్‌ బి.ఆర్‌.గవాయ్, న్యాయమూర్తులు జస్టిస్‌ వినోద్ చంద్రన్, జస్టిస్‌ ఎన్‌.వి. అంజరియాలతో కూడిన ధర్మాసనం, ఇప్పటికే బాంబే హైకోర్టులో విచారణ జరుగుతుండగా కేసును మద్రాసు హైకోర్టుకు బదిలీ చేయడం సరైనది కాదంటూ పిటిషన్‌ను కొట్టివేసింది. సోనీ మ్యూజిక్ తరఫు న్యాయవాది కూడా ఇదే వాదనను ప్రస్తావిస్తూ బాంబే హైకోర్టే సరైన వేదిక అని నొక్కిచెప్పారు.
అసలు విషయం ఏమిటి?
ఇళయరాజా స్వరపరిచిన పలు పాటలను వినియోగించేందుకు ఎకో, ఏఐజీ మ్యూజిక్ కంపెనీలు గతంలో ఒప్పందాలు చేసుకున్నాయి. అయితే కాపీరైట్ గడువు ముగిసిన తర్వాత కూడా తన పాటలను ఈ కంపెనీలు అనుమతి లేకుండానే వాడుతున్నాయని ఆరోపిస్తూ ఇళయరాజా 2014లో మద్రాసు హైకోర్టును ఆశ్రయించారు.
ఈ కేసులో 2019లో మద్రాస్ హైకోర్టు మధ్యంతర ఉత్తర్వులు జారీ చేస్తూ — నిర్మాతల నుంచి హక్కులు పొందిన మ్యూజిక్ కంపెనీలకు వాడే హక్కు ఉందని, అలాగే ఇళయరాజాకు కూడా వ్యక్తిగత హక్కు ఉంటుందని పేర్కొంది. పాటల వినియోగంపై తాత్కాలిక నిషేధం కూడా విధించింది.
కొత్త ట్విస్ట్ ఎక్కడుంచింది?
2022లో సోనీ మ్యూజిక్ ఎంటర్‌టైన్‌మెంట్‌ – ఇళయరాజా మ్యూజిక్ అండ్ మేనేజ్‌మెంట్‌ ప్రైవేట్ లిమిటెడ్‌కు చెందిన 536 పాటలపై తన హక్కులున్నాయని పేర్కొంటూ బాంబే హైకోర్టును ఆశ్రయించింది. దీంతో ఇదే పాటలపై మద్రాస్ హైకోర్టులోనూ, బాంబే హైకోర్టులోనూ వాదనలు జరగటం ప్రారంభమైంది.
ఈ క్రమంలో, రెండు కోర్టుల్లో ఒకేసారి కేసు నడవడం తప్పని అభిప్రాయంతో, అన్ని పిటిషన్లను మద్రాసు హైకోర్టుకు బదిలీ చేయాలని ఇళయరాజా కోరగా — సుప్రీంకోర్టు అది తప్పుపట్టింది. ఇప్పటికే విచారణలో ఉన్న కోర్టును మార్చడం సమంజసమేమిటని ప్రశ్నించింది.
Bottomline:
ఇళయరాజా తన సంగీతానికి సంబంధించిన హక్కుల కోసం పోరాటం చేస్తూనే ఉన్నా — న్యాయపరంగా ఈ వివాదం రోజురోజుకీ క్లిష్టంగా మారుతోంది. ఒకవైపు పాటలపై సృజనాత్మక హక్కులు, మరోవైపు నిర్మాతల కాంట్రాక్టులు, మ్యూజిక్ లేబుల్స్ వాదనలు… మొత్తం మీద భారత సంగీత చరిత్రలో ఇది ఒక గొప్ప కేసుగా మిగిలే అవకాశం ఉంది.
