స్టంట్ మాస్టర్ల కోసం బాలీవుడ్ ఖిలాడీ అక్షయ్ కుమార్ తీసుకున్న కొత్త నిర్ణయం పరిశ్రమను ఆశ్చర్యపరిచేలా చేసింది. ఎన్నో ప్రమాదాలను తలచేసుకుంటూ కెమెరా ముందు ప్రాణాల్ని పణంగా పెట్టే స్టంట్ వర్కర్ల కోసం అక్షయ్ భారీ ఖర్చుతో వైద్య ఇన్సూరెన్స్ సౌకర్యం అందించడంలో ముందుకొచ్చారు.
తమిళనాడుకు చెందిన స్టంట్‌మాన్ ఎస్‌ఎం రాజు ఇటీవల విశాల్ సినిమా షూటింగ్‌లో ప్రమాదవశాత్తూ ప్రాణాలు కోల్పోయారు. ఈ ఘటన అక్షయ్‌ను ఎంతో కలిచివేసినట్లు తెలుస్తోంది. ఆ వెంటనే ఆయన దేశవ్యాప్తంగా ఉన్న 650 మందికి పైగా స్టంట్ వర్కర్లకు హెల్త్ & యాక్సిడెంట్ ఇన్సూరెన్స్ కల్పించారు. ఈ ఇన్సూరెన్స్ ద్వారా ఒక్కో స్టంట్ వర్కర్ రూ. 5 నుండి 5.5 లక్షల వరకు క్యాష్‌లెస్ మెడికల్ ట్రీట్మెంట్ పొందే అవకాశం ఉంటుంది.
ఒక్క చిన్న గాయం వల్లే వృత్తిని కోల్పోయే ప్రమాదం, కుటుంబాన్ని పోషించలేని పరిస్థితి… ఇదే స్టంట్ వర్కర్ల వాస్తవం. వీరి జీవితాల్లో భద్రత, గౌరవం తక్కువగానే ఉంటుంది. అక్షయ్ చేసిన ఈ గొప్ప పనికి ఫిల్మ్ ఇండస్ట్రీతో పాటు సామాన్యులు కూడా అభినందనలు తెలుపుతున్నారు.
ఇది కేవలం ఓ సెలబ్రిటీ దయ చూపే చర్య కాదు, స్టంట్ వర్కర్ల విలువను గుర్తించడమే. అక్షయ్ కుమార్ నిజమైన ఖిలాడీ.
