‘అఖండ 2’ : సినిమా ఆగినా ..బాలయ్య ఆగటం లేదు!!

భారీ క్రేజ్‌తో థియేటర్లలో అడుగుపెట్టిన ‘అఖండ 2’కి రిలీజ్ తర్వాత పరిస్థితి పూర్తిగా మారిపోయింది. మొదటి భాగం ‘అఖండ’ సాధించిన సెన్సేషనల్ విజయం, పాన్ ఇండియా టార్గెట్‌తో చేసిన ప్రమోషన్స్ వల్ల ఈ సీక్వెల్‌పై అంచనాలు ఆకాశాన్ని తాకాయి. కానీ సినిమా విడుదలైన వెంటనే వచ్చిన మిశ్రమ టాక్, తొలి సోమవారం నుంచే కలెక్షన్లలో భారీ డ్రాప్, వీకెండ్‌లో కూడా ఆశించిన స్థాయి పికప్ లేకపోవడం… ఇవన్నీ కలిసి బాక్సాఫీస్ వద్ద చిత్రాన్ని నెమ్మదింపజేశాయి. ముఖ్యంగా నార్త్ ఇండియా మార్కెట్‌లో సినిమా ప్రభావం లేకపోవడం ట్రేడ్ వర్గాల్లో చర్చనీయాంశంగా మారింది.

హిందీ వెర్షన్ విషయానికి వస్తే పరిస్థితి మరింత నిరాశాజనకంగా ఉంది. మొదటి వారం ముగిసేలోపే దేశవ్యాప్తంగా హిందీ వెర్షన్ ఒక్క కోటి రూపాయల మార్క్ కూడా దాటలేకపోయింది. పాన్ ఇండియా రిలీజ్‌గా ప్రచారం చేసిన సినిమాకు ఇది పెద్ద షాక్‌గా మారింది. నార్త్ ప్రేక్షకులను థియేటర్లకు రప్పించడంలో ‘అఖండ 2’ పూర్తిగా విఫలమైందన్న అభిప్రాయం స్పష్టంగా వినిపిస్తోంది.

అయితే ఈ పరిస్థితులన్నింటినీ పట్టించుకోకుండా నందమూరి బాలకృష్ణ తన దారిలో తాను ముందుకెళ్తున్నారు. సినిమా ఆగినా బాలయ్య ఆగటం లేదన్నట్టుగా ఆయన ప్రమోషన్లు కొనసాగిస్తున్నారు. కలెక్షన్ల డ్రాప్, నెగటివ్ టాక్, నార్త్‌లో స్పందన లేకపోవడం… ఇవేమీ తన ఉత్సాహాన్ని తగ్గించలేదన్నట్టుగా బాలకృష్ణ ప్రవర్తన కనిపిస్తోంది.

శుక్రవారం ఆయన దర్శకుడు బోయపాటి శ్రీనుతో కలిసి వారణాసి వెళ్లి కాశీ విశ్వనాథుడిని దర్శించుకున్నారు. అక్కడ ప్రత్యేక పూజలు నిర్వహించిన అనంతరం మాట్లాడిన బాలకృష్ణ, ‘అఖండ 2’లోని సనాతన ధర్మ సందేశాన్ని ప్రేక్షకులు మెచ్చుకుంటున్నారని అన్నారు. సినిమా ఫలితం ఎలా ఉన్నా, తాను నమ్మిన విషయాన్ని, సినిమా చెప్పాలనుకున్న ఆత్మను ప్రచారం చేయడం తన బాధ్యతగా భావిస్తున్నట్టు ఆయన మాటల్లో స్పష్టంగా కనిపించింది.

‘అఖండ 2’ బ్లాక్‌బస్టర్ అయిన ‘అఖండ’కి సీక్వెల్‌గా తెరకెక్కింది. మొదటి భాగం బాక్సాఫీస్‌ను షేక్ చేయగా, ఈ సీక్వెల్ మాత్రం అదే ఊపును కొనసాగించలేకపోయింది. ప్రస్తుతం సినిమా గణనీయమైన నష్టాల వైపు సాగుతున్నట్టుగా ట్రేడ్ అంచనాలు చెబుతున్నాయి. అయినప్పటికీ బాలకృష్ణ మాత్రం తగ్గేదేలే అన్న ధోరణితో సినిమా ప్రమోషన్లలో పాల్గొంటూ, ముఖ్యంగా నార్త్ ఇండియాలోనూ తన ప్రయత్నాన్ని కొనసాగిస్తున్నారు.

మొత్తానికి, బాక్సాఫీస్ నంబర్లు నిరాశపరిచినా, బాలయ్య నమ్మకం మాత్రం చెదరలేదన్నది స్పష్టంగా కనిపిస్తోంది. సినిమా ఆగినా… బాలయ్య ఆగటం లేదు అన్న మాటే ఇప్పుడు ‘అఖండ 2’ ప్రయాణాన్ని చెప్పే సరైన లైన్‌గా మారుతోంది.