త్రివిక్రమ్… తాజాగా అల్లు అర్జున్‌తో చేయాల్సిన సినిమా వాయిదా పడింది. కారణం – బన్నీ ప్రస్తుతం అట్లీ డైరెక్షన్‌లో ఓ భారీ ప్రాజెక్ట్‌కి కేటాయించిన డేట్లు. ఇది పూర్తవ్వాలంటే కనీసం రెండేళ్లు పడతాయనే టాక్. అంటే, త్రివిక్రమ్ ఆవరకూ ఆగాలా?
అవును అన్నట్టే… కానీ అసలు విషయంలోకి వస్తే, త్రివిక్రమ్ ఖాళీగా కూర్చోవడం అంత ఈజీ కాదు. ఆయన ప్రస్తుతం వెంకటేష్‌తో ఓ మిడిల్ రేంజ్ మాస్ ఫ్యామిలీ ఎంటర్టైనర్ ప్లాన్ చేస్తున్నట్టు టాలీవుడ్ వర్గాల్లో వినిపిస్తోంది. సంక్రాంతికి ‘సంక్రాంతికి వస్తున్నాం’ అనే చిన్న సినిమాతో మళ్లీ ఫామ్‌లోకి వచ్చిన వెంకీ మామ, ఇప్పుడే సరైన సబ్జెక్ట్ కోసం వెయిట్ చేస్తున్న సమయంలో, త్రివిక్రమ్ కథ వినిపించి ఓకే చేయించుకున్నారని టాక్.
ఫ్యామిలీ ఎంటర్‌టైనర్‌గా తెరకెక్కుతున్న ఈ సినిమాకి సంబంధించిన ఫైనల్ స్క్రిప్ట్‌ను ఈ నెలాఖరులోగా సిద్ధం చేయనున్నట్టు సమాచారం. త్రివిక్రమ్ ప్రీ-ప్రొడక్షన్ వర్క్‌ను స్పీడుగా ముగించి, ఈ ఏడాది జూలైలో షూటింగ్ ప్రారంభించనున్నారు.
ఈ చిత్రాన్ని 2026 సంక్రాంతికి విడుదల చేయాలనేది ఫస్ట్ వేసుకున్న ప్లాన్ అయినప్పటికీ, త్రివిక్రమ్ మరియు అతని టీమ్ హడావిడిగా కాకుండా ప్లాన్ ప్రకారం షూటింగ్ పూర్తి చేయాలని నిర్ణయించుకున్నారు. టైటిల్ ఇంకా పెట్టని ఈ ఫ్యామిలీ ఎంటర్టైనర్ 2026 వేసవిలో విడుదల కానుంది.
హారిక అండ్ హాసిని క్రియేషన్స్ ఈ చిత్రాన్ని నిర్మిస్తుంది మరియు థమన్ సంగీత స్వరకర్తగా బోర్డులో ఉన్నారు. డిసెంబర్ లోపు షూటింగ్ ఫార్మాలిటీస్ పూర్తవుతాయి.
ఇద్దరూ ప్రస్తుతం ఖాళీగా ఉండటం, ఇద్దరికీ ఫ్యామిలీ ఆడియన్స్ మీద పట్టు ఉండటం వల్ల ఈ కాంబినేషన్‌కి మంచి చాన్స్ ఉందంటున్నారు. పైగా, త్రివిక్రమ్ తన మార్క్ హ్యూమర్, డైలాగ్స్‌తో వెంకటేష్ కామెడీ టైమింగ్‌కి బ్యూటిఫుల్‌గానే సెట్ అవుతాడని టాక్ బలంగా వినిపిస్తోంది.
ఇక అధికారికంగా ఈ ప్రాజెక్ట్ అనౌన్స్‌మెంట్ ఎప్పుడవుతుందనేది చూడాలి. కానీ ఒకటి మాత్రం స్పష్టం – త్రివిక్రమ్ కొత్త ప్రయోగం కోసం సిద్ధమవుతున్నాడు. వెంకటేష్‌తో కలిసి మరొకసారి ఫ్యామిలీ ఆడియన్స్‌ను మెప్పించేందుకు సిద్ధమవుతారా?
