కరోనా ప్యాండ్‌మిక్ త‌ర్వాత తెలుగు సినిమాకు గణనీయమైన మార్పులు ఎదురయ్యాయి. ఓటిటీల రాకతో బడా నటులకు భారీ రెమ్యూనరేషన్లు వస్తుండగా, నిర్మాతలకైతే కష్టకాలం మొదలైంది. ఓపక్క శాటిలైట్ మార్కెట్ పూర్తిగా కుప్పకూలిపోయింది. మరోవైపు, ఎన్నేళ్లుగా హిందీ మార్కెట్ (సాటిలైట్, డిజిటల్)పై డిపెండ్ అయిన రవి తేజ, గోపీచంద్, బెల్లంకొండ శ్రీనివాస్, రామ్ వంటి మిడిల్‌రేంజ్ హీరోలకు ఇప్పుడు అక్కడ ఎలాంటి డిమాండ్ లేదంటే పరిస్థితి ఎంత దిగజారిందో అర్థం అవుతుంది.
ఇప్పుడు పరిస్థితి ఏంటంటే – వీరి సినిమాలకు హిందీ రైట్స్ తీసుకునే వాళ్లే కనిపించడంలేదు. ఫలితంగా, థియేటర్లలో సినిమా పాస్ కాకపోతే నిర్మాతలకే భారీ నష్టాలు. కానీ నటుల రెమ్యూనరేషన్లలో మాత్రం ఎటువంటి తగ్గింపు లేదు. ఈ “హిందీ రైట్స్” పేరిట డబ్బులు రాబట్టలేక, అయినా గుడి కట్టిన భక్తుడిలా హీరోలతో సంబంధం కొనసాగించాలన్న నిబద్ధతతో నిర్మాతలు తమ జేబులకే నిప్పంటించుకుంటున్నారు.
సాటిలైట్ డీల్స్ తగ్గిపోవడం, నార్త్ మార్కెట్ అస్తవ్యస్తం కావడం, ఓటీటీల్లో మారిన ట్రెండ్స్… ఇవన్నీ కలిసొచ్చి, ఇప్పుడీ మిడిల్ రేంజ్ హీరోల సినిమాలు చేయాలంటే నిర్మాతలు పది సార్లు ఆలోచించాల్సిన పరిస్థితి. ఇక బడా హీరోల దయాదాక్షిణ్యాలకే ఈ సినీ వ్యవస్థ ఆధారపడాల్సిన దుస్థితి వచ్చినట్లే!
