టాలీవుడ్ కింగ్ నాగార్జున దాఖలు చేసిన పిటిషన్‌పై ఢిల్లీ హైకోర్టు కీలక తీర్పు వెలువరించింది. ఆయన పర్సనాలిటీ రైట్స్ను రక్షిస్తూ, ఇకపై నాగార్జున పేరు, వాయిస్, ఫొటోలు ఎలాంటి వాణిజ్య ప్రయోజనాలకు ఆయన అనుమతి లేకుండా వాడకూడదని స్పష్టమైన ఆదేశాలు జారీ చేసింది.
ఏఐ, డీప్‌ఫేక్‌లపై కోర్టు హెచ్చరిక
జస్టిస్ తేజస్ కారియా నేతృత్వంలోని ధర్మాసనం ఈ మధ్యంతర ఉత్తర్వులు ఇచ్చింది. ఏఐ, మెషిన్ లెర్నింగ్, డీప్‌ఫేక్ టెక్నాలజీలను ఉపయోగించి నాగార్జున ఇమేజ్‌ను దుర్వినియోగం చేస్తే కఠిన చట్టపరమైన చర్యలు తప్పవని కోర్టు హెచ్చరించింది.
ఫేక్ యాడ్స్ – అశ్లీల వీడియోల ప్రస్తావన
విచారణలో నాగార్జున తరఫున సీనియర్ న్యాయవాదులు ప్రవీణ్ ఆనంద్, వైభవ్ గాగ్గర్, వైశాలి మిత్తల్ వాదనలు వినిపించారు.
నాగార్జున ప్రజాదరణను వాడుకుని కొందరు నకిలీ ప్రకటనలు, అశ్లీల కంటెంట్, టీషర్టుల అమ్మకాలు చేస్తున్నారని వారు కోర్టు దృష్టికి తీసుకెళ్లారు. అలాగే యూట్యూబ్ షార్ట్స్‌లో ఫేక్ వీడియోలు వైరల్ అవుతున్నాయన్న అంశాన్ని కూడా ప్రస్తావించారు.
నాగార్జున గుర్తింపుకు రక్షణ
95 సినిమాల్లో నటించి, రెండు జాతీయ పురస్కారాలు అందుకున్న నాగార్జునకు సోషల్ మీడియాలో విపరీతమైన అభిమాన బలం ఉంది. ఈ ప్రజాదరణను వాణిజ్య ప్రయోజనాల కోసం దుర్వినియోగం చేయకుండా ఉండేందుకు కోర్టు ఇచ్చిన ఆదేశాలు ఒక మైలురాయిగా భావిస్తున్నారు.
నిపుణుల అభిప్రాయం
ప్రస్తుత డిజిటల్ యుగంలో సెలబ్రిటీల హక్కుల పరిరక్షణకు సంబంధించి ఈ తీర్పు అత్యంత ప్రాధాన్యత కలిగినదని న్యాయ నిపుణులు పేర్కొంటున్నారు.
