బాలీవుడ్‌లో యష్ రాజ్ ఫిలిమ్స్ (YRF) స్పై యూనివర్స్ మీద అంచనాలు ఏ రేంజ్‌లో ఉన్నాయో ప్రత్యేకంగా చెప్పాల్సిన అవసరం లేదు. ‘వార్ 2’ రిలీజ్ కాకముందు పరిస్థితి చూస్తే, సినిమా ఇండియన్ హిస్టరీలోనే మైలు రాయి అవుతుందని, హృతిక్ రోషన్ – ఎన్టీఆర్ కాంబో తుపాన్ సృష్టిస్తుందని అభిమానులు, ట్రేడ్ సర్కిల్స్‌లో ఊహాగానాలు. సోషల్ మీడియాలో ఒక్క పోస్టర్ పడినా పండగ చేసుకున్నంత హంగామా నెలకొంది.
కానీ రిలీజ్‌కి వచ్చిన తర్వాతే అసలు షాక్ మొదలైంది. రివ్యూలు, మౌత్ టాక్ మొదటి రోజే తీవ్రంగా దెబ్బకొట్టాయి. కంటెంట్ బలహీనత, యూనివర్స్‌ను కట్టిపడేయాల్సిన నారేటివ్ లోపం, ప్రేక్షకులకి కనెక్ట్ కాకపోవడంతో బాక్సాఫీస్ వద్ద ఊహించని విధంగా కుప్పకూలింది. ట్రేడ్ అంచనాలు, అడ్వాన్స్ బుకింగ్స్ చూసి రికార్డులు బద్దలయ్యేలా ఉందని అనుకున్నా… వారం రోజుల్లోనే సినిమా రన్ ఆగిపోయింది.
ఈ ఫెయిల్యూర్ తో పెద్ద షాక్ తిన్నది యష్ రాజ్ ఫిలిమ్స్. అసలు గేమ్‌ప్లాన్ ఏంటంటే — వార్ 2 లో ఎన్టీఆర్ క్యారెక్టర్‌ను ఇంట్రడ్యూస్ చేసి, తర్వాత హృతిక్ లా ఆయనకూ ఓ ప్రత్యేక సోలో స్పిన్‌ఆఫ్ ఇవ్వాలని ప్లాన్. బాలీవుడ్‌లో వరుసగా సినిమాలు చేసి పాన్-ఇండియా స్టార్‌గా ఎన్టీఆర్ హిందీలో కూడా స్థిరపడిపోతాడనే బలమైన బజ్. కానీ వార్ 2 ఫలితంతోనే ఆ కల సగం దాకా చిద్రమైపోయింది.
బాలీవుడ్ వర్గాల నుంచి అందుతున్న సమాచారం ప్రకారం, ఆ అడుగు తీసుకునే ధైర్యం యష్ రాజ్ వద్ద ఇక లేదు. ఆ కాంపానియన్ స్పిన్‌ఆఫ్ ప్రాజెక్ట్‌ను వారు ప్రస్తుతం “ఇండెఫినెట్‌గా హోల్డ్” లో పెట్టారట. అంటే ఇప్పుడు ఎన్టీఆర్‌కి హిందీలో ఓ సోలో YRF సినిమా వచ్చే అవకాశాలు పూర్తిగా మాయమయ్యాయని చెప్పాలి.
అయితే, ఎన్టీఆర్ నిరుత్సాహ పడకుండా దృష్టిని మళ్లిస్తున్న ప్రాజెక్ట్ ఉంది — ప్ర‌శాంత్ నీల్‌తో చేస్తున్న భారీ యాక్షన్ ఎంట‌ర్‌టైన‌ర్. సలార్ తరహా ప్యాకేజింగ్‌తో, ఆ సినిమా ఎన్టీఆర్ కెరీర్‌లో మరొక డిఫైనింగ్ టర్న్ అవుతుందని ఇండస్ట్రీలోనూ, అభిమానుల్లోనూ నమ్మకం ఉంది.
మొత్తానికి, బాక్సాఫీస్ వద్ద ‘వార్ 2’ ఫెయిల్యూర్… ఎన్టీఆర్‌కు హిందీలో సోలో ఎంట్రీ తలుపులు మూసేసింది.
